Esta guía didáctica enmárcase nos seguintes bloques temáticos de "Bioloxía e Xeoloxía" de 1ºESO:

• O bloque 1 "Proxecto científico" introduce o alumnado no pensamento e métodos científicos promovendo a formulación de preguntas, a elaboración de hipóteses, a planificación e realización de experimentos, a observación rigorosa, a análise de datos e a comunicación de resultados. Todo isto serviralles de base para investigar e comprender a diversidade dos catro reinos de seres vivos. 
• O bloque 2 "a célula" abórdase o modelo de ser vivo, entendido non só pola súa organización celular, senón tamén polas tres funcións vitais que realiza todo organismo: a nutrición, a relación e a reprodución. Esta análise permite ao alumnado identificar e diferenciar entre organismos unicelulares e pluricelulares, servindo como punto de partida para a clasificación dos seres vivos segundo a súa estrutura e nivel de organización. Así mesmo, contribúe á comprensión das funcións vitais nos distintos grupos e da súa relación coa complexidade biolóxica de cada tipo de organismo.
• O bloque 3 "os seres vivos" céntrase na caracterización e clasificación dos principais grupos de seres vivos pertencentes aos catro reinos estudados: Moneras, Protoctistas, Fungos e Plantas. A través do seu estudo, proporciónanse recursos e estratexias para o recoñecemento de especies, tanto microscópicas como macroscópicas, fomentando a observación directa e a identificación de exemplares na contorna próxima. Ademais, promóvese unha visión integradora da biodiversidade, destacando o papel ecolóxico que desempeñan os distintos grupos no equilibrio dos ecosistemas.
  

Así mesmo, este REA contribúe aos obxectivos de desenvolvemento sostible (ODS),  ODS 14 (Vida mariña) e ODS 15 (Vida de ecosistemas terrestres), promovendo o respecto pola biodiversidade e o uso sostible dos ecosistemas acuáticos e terrestres.