Taller ArTeMática

Este é o REA (Recurso Educativo Aberto) número 7 —dun total de 8— elaborado no proxecto cREAgal para a materia de Matemáticas de 3.º de Educación Secundaria Obrigatoria.
A situación de aprendizaxe ten como fío condutor a actividade creativa nun taller artesanal. Traballando de forma individual e en equipo, explorarás conceptos relacionados cos movementos no plano: translacións, rotacións e reflexións, aplicándoos ao deseño de pezas únicas.
A través da análise de formas e patróns, descubrirás como a xeometría permite transformar unha idea nun obxecto real. Utilizarás os vectores e as transformacións isométricas como ferramentas de precisión para xerar composicións equilibradas e estéticas. Ademais, aprenderás a identificar e aplicar frisos e mosaicos, comprendendo como a repetición e o xiro de figuras elementais poden dar lugar a estruturas complexas e visualmente atractivas.
O reto consiste en deseñar e fabricar a vosa propia "Xoia da amizade". Para iso, deberás aplicar os movementos estudados no deseño da peza, que finalmente cobrará vida mediante o uso da cortadora láser do centro. Cada equipo presentará a súa creación xunto cunha memoria técnica que detalle as transformacións matemáticas empregadas, demostrando como a unión entre a artesanía tradicional e a tecnoloxía dixital fundaméntase na precisión das leis xeométricas.