¡Cuento contigo!

Este é o REA (Recurso Educativo Aberto) número 4 elaborado no proxecto cREAgal para a materia de Lingua Castelá e Literatura de 1º de Educación Secundaria Obrigatoria.

Nesta situación de aprendizaxe o alumnado colaborará para facer do centro educativo un lugar máis inclusivo e respectuoso coa diversidade. A partir da lectura e da análise de textos literarios de distintos xéneros (narrativo, poético e dramático) crearán textos narrativos que os reinterpreten actualizándoos para facelos máis inclusivos.

O reto final será crear unha sesión de contacontos no que se reciten e interpreten estas novas versións dos contos. Trátase de que o alumnado detecte as discriminacións e a necesidade de xerar unha contorna máis inclusiva en canto ás multiplicidades de maneiras de estar no mundo.

Para facer isto, o alumnado traballará os contidos da materia relativos aos xéneros literarios, facendo especial fincapé no xénero narrativo (tanto dentro da literatura como nos textos non literarios), ás características propias da lingua oral e da lingua escrita, aos usos non discriminatorios da lingua e a importancia do rigor ortográfico na lingua escrita.