Adobe

Mestura de barro e auga que funciona moi ben en climas secos. Soe aplicarse en ladrillos de adobe: pezas paralelepípedas de masa de barro (con ou sen palla) que, logo de secarse ó sol, dispóñense en ringleiras.

Superadobe

Sacos de polipropileno recheos de terra estabilizada e compactada superpostas entre si por medio dun arame de púas. Casas con formas orgánicas.

Cob

Muro macizo construído con arxila, area amontonada e pedras que se aplican en capas con masa húmida.

Na imaxe podedes ver a Casa terracota deseñada polo arquitecto Octavio Mendoza, considerada a obra en arxila mais grande do mundo. A casa ocupa unha área de 500 m2 e para a súa construción usáronse 400 T de barro. É unha casa perfectamente funcional, conta con varias habitacións, cociña, baños e mobles, todos construídos en arxila. O seu interior é bastante iluminado grazas ás ventás situadas nos laterais e parte superior da casa.

BTC

O BTC ou Bloque de terra comprimida é un material de construción fabricado cunha mestura de terra e un material estabilizante (cal aérea, cal hidráulica, arxila… ), que é comprimida e moldeada usando una prensa mecánica. 

O BTC é un substituto do ladrillo corrente. Colócase en muros usando unha mestura de morteiro co mesmo material do estabilizante.

Barrotillo

Sistema constructivo tradicional da penísula. Consiste nun entramado de listón de madeira nunha armazón de madeira recuberta con barro, palla e xeso. En Galicia usábase nos tabiques de división interiores.

Quincha

Sistema constructivo tradicional de Sudamerica, é un entramado de caña ou bambú, nunha armazón de madeira recuberta con barro e palla.

Tapial

Muro macizo construído con arxila e area amontoada e prensada cun pisón. 

Encofrado, vértese a terra por tongadas duns 10-15 cms e compáctase mediante o prensado.

Palla

A palla é un material abundante e 100% ecolóxico con moi boas propiedades illantes.

Posibles usos:

• Con pacas de palla enteira, construíndo un muro de palla autoportante.
• Con paca de palla enteira para recheo e estrutura de madeira.
• Con palla solta, encofrada e estrutura de madeira.
• Con paneis prefabricados de palla.

Biocerámica

A biocerámica é un material resistente e orgánico que se concibiu inicialmente para o seu uso en medicina pola súa nula toxicidade. As primeiras biocerámicas foron a hidroxiapatita (similar á composición do óso) e o óxido de circonio (implantes, próteses e reparación de tecidos óseos). Co tempo, as boas propiedades térmicas, illantes, higroscópicas, ignífugas e ecolóxicas das biocerámicas, fixéronas candidatas ideais na Arquitectura bioclimática.

As biocerámicas en arquitectura están compostas de:

• Arcillas especiais e silicatos, con alta capacidade de regulación térmica e humidade.
• Óxidos cerámicos avanzados, con alta resistencia térmica e mecánica, o que os fai aptos para paneis illantes e revestimentos de fachadas.
• Microesferas cerámicas, que engadidas a pinturas e revestimentos reducen a absorción de calor, o que as fai útiles en tellados e fachadas en climas cálidos.
• Compostos con hidroxiapatita, empregados con fins de mellorar a nosa saúde pola súa boa absorción de compostos contaminantes do aire.

Hai 70 anos, o visionario Buckminster Fuller deseñou unhas vivendas tipo domo para un futuro de temperaturas extremas. Xa estamos no futuro, xa temos ese clima, e xa hai as zonas do planeta asolagadas polos incendios que precisan vivendas que ofrezan seguridade e refuxio en condicións extremas. Así está construíndo xa Geoship en California.