Relación de familia: o timbre
Semella unha tolería, pero tal e como acontece coas persoas, os instrumentos musicais tamén pertencen a unha familia determinada, e incluso ocupan unha posición dentro da mesma atendendo á relación que manteñen cos demais membros. Na actividade anterior aprendemos a clasificar os instrumentos musicais en función do seu rexistro, que podía ser grave ou agudo, e tamén chegamos a conclusión de que o seu tamaño influía moito no son que producen. Pois ben, desta volta imos estudar a clasificación dos instrumentos en función dos materiais que producen o son.
Inflúe o material dun instrumento no son que produce?
A resposta é moi breve: si. Como é de agardar cada material transmite o son dunha maneira determinada, xa que as vibracións que forman as ondas sonoras non avanzan do mesmo xeito pola madeira, o plástico, o metal ou o vidro. Algúns materiais como a cortiza case non deixan avanzar o son (por iso son empregados para illar acústicamente) mentres que outros como o metal teñan unha boa capacidade para conducir as vibracións producidas polo son. Podemos facer unha pequena proba golpeando un mesmo obxecto con materiais distintos, e veremos de primeira man como varía o son.
Pero ollo! Non é ouro todo o que reluce...
Para clasificar correctamente os instrumentos por familias deberemos fixarnos en cal é o material que produce o son nun comezo, é dicir, cal é a orixe das vibracións que despois iranse intensificando. O certo é que existen algúns instrumentos impostores que están agochados en familias que aparentemente non lle pertencen, porque o seu corpo está construído nun material pero a forma na que se orixina o son é outra. Non os perderemos de vista!
No seguinte vídeo podedes ampliar coñecementos sobre as diferentes familias de instrumentos musicais. Prestade especial atención ós intrumentos da familia de vento, xa que nun momento teremos que responder a algunhas preguntas da seguinte actividade para descubrir cal é o instrumento impostor!
Como acontece coa voz das persoas, cada instrumento musical ten un son único que o diferencia do resto, incluso dos demais membros da súa propia familia. Por iso, podemos recoñecer unha trompeta cando a escoitamos, e a diferenciamos dunha guitarra sen necesidade de empregar os ollos, do mesmo xeito que recoñecemos a voz dos nosos amigos ou familiares máis achegados tan só con escoitar unha palabra. Esta calidade do son coñécese co nome de TIMBRE, e tal e como acabamos de aprender nesta unidade, o timbre ten que ver co material do que está feito o instrumento e tamén coa súa forma e tamaño.
