Arts and crafts!
- Duración:
- 00:30
- Agrupamento:
- Ilimitado
Para rematar esta unidade didáctica, centrarémonos na construción do noso propio instrumento empregando materiais de refugallo. Tedes aquí abaixo a listaxe con todos os obxectos que precisamos para facelo realidade!
LISTAXE DE MATERIAIS
Para construír o noso kazoo, necesitaremos os seguintes materiais:
- Tubo de cartón (preferiblemente longo, do estilo de papel de cociña)
- Cinta adhesiva fina
- Papeis ou cartulinas de cores
- Tesoiras
- Perforadora
- Pegamento (o ideal é o pegamento de barra)
- Lápis e pinturas de cores
- Cordel (opcional)
Unha vez teñamos todo preparado, seguiremos as seguintes indicacións para realizalo dunha forma sinxela e non trabucarnos!
INDICACIÓNS
PASO 1
Recortamos e decoramos o papel
O primeiro que imos facer é comprobar que o tamaño do papel sexa o axeitado. Para conseguilo, enrolaremos o tubo de cartón de maneira que quede completamente cuberto, e faremos unha pequena marca de referencia no papel para saber a cantidade que sobra. Cortaremos a parte sobrante, de forma que o papel se axuste ao cartón o máximo posíbel.
. Kazoo- Paso 1 (CC BY)
Unha vez recortado, deberemos colorear o papel co deseño que máis nos guste. Esta parte é completamente libre así que deixade voar a vosa imaxinación!
PASO 2
Colocamos a tapa
Coa cinta adhesiva, cubriremos un extremo do cartón, de maneira que o oco quede completamente pechado. É importante empregar soamente unha capa, xa que a cinta vibrará ao pasar o aire, e se é demasiado grosa non poderá facelo. Se o ancho da cinta non é suficiente para tapar todo o burato, podemos solpar dúas tiras adhesivas pegando unha esquina de cada unha na franxa central. Podemos reforzar as unións da cinta coas paredes do tubo de cartón sen problema, dándolle un par de voltas máis ó arredor (segunda imaxe).
Iván Suárez. Kazoo- Paso 2A (CC BY)
PASO 3
Pegamos o papel
Empregando pegamento (o máis axeitado é o de barra), cubriremos o tubo de cartón co papel pintado de forma que ocupe toda a súa superficie. Pestade especial atención nas unións para que non se despegue con facilidade. Para que quede máis resistente, pódese reforzar cunhas voltas de cinta adhesiva transparente pola parte exterior.
PASO 4
Últimos retoques
Para finalizar, faremos dúas pequenas modificacións para que o noso kazoo funcione á perfección.
- Realizaremos dous pequenos buratos coa axuda dunha perforadora (ou a punta das tesoiras) na parte do tubo contraria á tapa.
- Pasaremos o cordel polos buratos, facendo un nó para poder colgar o instrumento do pescozo.
. Kazoo- Paso 4 (CC BY)
E... listo! Xa temos o noso instrumento preparado para tocar. Picade no apartado "SABÍAS QUE?" para aprender algunhas cousiñas importantes sobre a a súa historia e funcionamento.
O kazoo, tamén coñecido como mirlitón, é un instrumento que ao coñecelo por primeira vez pode despistar un pouco: a pesar de ter toda a pinta de instrumento de vento o certo é que pertence a unha familia menos coñecida, a familia dos membranófonos. Este tipo de instrumentos producen o son facendo vibrar unha membrana que teñen no interior (no caso do kazoo pois trátase da tapa que colocamos empregando cinta adhesiva). As súas orixes non están claras, pero pénsase que os primeiros modelos foron inventados por un reloxeiro alemán a mediados do século XIX. A realidade é que hoxe en día é un recurso moi empregado en multitude de xéneros musicais, que van dende o country, o jazz, a música folk e incluso a música tradicional... pero de seguro ídelo coñecer polo papel tan importante que xoga cando chega o entroido! Poden fabricarse en diferentes materiais, pero os máis afamados son os que teñen o corpo de metal.
No seguinte vídeo podedes botarlle un ollo a interpretación con kazoo dunha canción que todos/as coñecedes! Fixádevos que efecto máis curioso provoca este instrumento tan divertido na voz!
