Saltar la navegación

Loitando contra os transtornos alimentarios

11-1-10
Alexis Nyal. 11-1-10 (CC BY)

Cada ano, centos de adolescentes desenvolven transtornos da alimentación ou problemas de peso, de alimentación ou coa súa imaxe corporal.

Os transtornos da alimentación representan extremos nas condutas alimentarias e na forma de pensar na comida. Por exemplo, a dieta non remata xamáis, e cada día é máis restritiva. A persoa non pode sair coas amigas e amigos porque pensa que é máis importante ir correr para eliminar un bocadillo que comeu un rato antes. (1)

Para combater estas condutas prexudiciais, informarémonos sobre elas e transmitiremos o aprendido ás nosas compañeiras e aos nosos compañeiros, na nosa aula e no resto de cursos do Centro Educativo. Farémolo mediante cómics, que serán expostos nun lugar ben visible do Centro: nun corredor ou no vestíbulo da entrada, por exemplo.

(1) TeensHealth, «Transtornos de la alimentación». Recurso online. [Acceso: maio de 2017]

Investigamos

Hábitos tóxicos relacionados coa alimentación

Os hábitos nocivos ou tóxicos son condutas repetidas que prexudican seriamente a saúde. Entre estas condutas prexudiciais, atópanse varios hábitos tóxicos que están relacionados coa alimentación. E moitos deles poden afectar aos adolescentes.

To eat or not to eat
daniellehelm. To eat or not to eat? (CC BY)

Transtornos da conduta alimentaria: bulimia e anorexia

Seguro que máis dunha vez escoitaches falar de anorexia e de bulimia. Sabes realmente en que consisten? Son problemas graves? Por que?

O primeiro que temos que facer é informarnos sobre estes transtornos.

Información sobre os Transtornos da Conduta Alimentaria (TCA):

  • Web da Asociación de Bulimia e Anorexia da Coruña: ligazón.
  • Web da Asociación contra a Anorexia e a Bulimia de Cataluña: ligazón.

Sinais de alerta

A fin de tratar e resolver os Transtornos da Conduta Alimentaria (TCA), un dos factores fundamentais é intervir a tempo. Para elo, é precisa a súa detección temperá. Unha vez detectado un TCA, a persoa afectada pode ser informada de que ten un problema de súade, e pode buscar os medios para solucionalo.

Como saber se unha persoa sofre un posible caso de TCA? Existen cambios nas persoas que poden ser sinais de alerta. Infórmate na Rede sobre algúns destes sinais, por exemplo, na web do Instituto de Transtornos Alimentarios ou na web de GuiaSalud.

Debate

Credes que este tipo de transtornos son graves? Como afectan á xente da vosa idade? Existen máis hábitos tóxicos relacionados coa alimentación que poidan afectar á saúde dos adolescentes? Facede un debate entre os membros do equipo e expoñede as conclusións ao resto de equipos.

Tarefa para entregar

comic gold
Badheartbull. Comic Gold (CC BY-SA)

Traballaredes en equipos de tres ou catro persoas co obxectivo de elaborar un cómic no que unha rapaza ou un rapaz dea consellos á xente en perigo de sofrer un TCA e ideas para superar esa situación, resumindo a información máis importante do que invetigastes e as vosas reflexións e achegas. Esta tarefa pode desenvolverse na aula de Educación Plástica, Visual e Audiovisual.

  • Lembrade que estes transtornos poden ser extremadamente graves para a saúde das persoas que os sofren, así que tedes que ser moi coidadosos e sensibles á hora de elaborar os guións e as imaxes dos cómics.
  • O primeiro labor será escribir o guión, que desenvolverá a historia co máximo detalle. No guión tedes que describir o que hai en cada cadriño (viñeta), un por un. O guión explicará en detalle as imaxes que ides debuxar e conterá os diálogos definitivos.
  • A historia ten que transmitir ideas positivas, e de esperanza. Ten que ter un ton optimista.
  • Utilizaredes as técnicas gráfico-plásticas que vos propoña o voso profesor ou profesora, aplicándoas de forma axeitada ao obxectivo da actividade. Podedes tamén empregar ferramentas dixitais.
  • Cada cómic terá unha única páxina, debuxada (ou impresa) nun tamaño medio ou grande: o máis axeitado sería un formato DIN A3 (297×420 mm).
  • Lembrade que os cómics contan historias de xeito secuencial, empregando varias viñetas. No voso cómic, o número de viñetas será, como mínimo, de catro.

Unha vez terminados os cómics, colgarémolos nas paredes do corredor ou no vestíbulo do centro. Debemos tomar fotos dos cómics ou escanealos, para poder compartilos na Rede a través dun blog, web do centro, redes sociais...

Avaliación da tarefa

Para avaliar a tarefa empregaranse as seguintes rúbricas:

Mirádeas ben antes de empezar o traballo e comprobade ao rematar se cumprides os requisitos contidos nelas.

Reflexión

Redacta agora unha entrada no teu Diario, falando da experiencia facendo os carteis.