Dentro do proxecto CREAgal partimos dunha metodoloxía baseada na aprendizaxe por competencias e activa, que o profesorado de 1º ESO poderá adaptar ao centro e alumnado para o que se utilice este REA (Recurso Educativo Aberto) que ten como punto de partida a PD modelo de PROENS pero establecendo o seguinte reto: 

Elixir algunha das pegadas materiais ou inmateriais que Roma deixou na sociedade actual. En grupo, o alumnado deberá investigar sobre ela para facer unha presentación en clase en algún dos formatos propostos. Por último debaterase sobre a importancia das pegadas da civilización romana na nosa sociedade actual.

No fondo, toca facer ao alumnado protagonista da súa propia aprendizaxe (CPSAA): a través do reto e das actividades planificadas nas diferentes fases deste. Actividades individuais, en grupo, e con diferentes graos de dificultade adaptándonos aos diferentes ritmos de aprendizaxe e á diversidade existentes na aula (DUA).

Como cremos que os alumnos e alumnas aprenden mellor cando teñen un papel protagonista no proceso de aprendizaxe, este REA está confeccionado seguindo unha metodoloxía activa e participativa, baseada nos seguintes aspectos:

• Primarase a flexibilidade e para tal finalidade proporanse actividades multinivel, cun enfoque metodolóxico personalizado.
• O alumnado será parte activa no proceso de ensinanza-aprendizaxe e converterase no auténtico centro deste.
• Fomentarase polo tanto a autonomía do alumnado e a súa capacidade de auto-aprendizaxe (aprender a aprender).
• A aprendizaxe será:
  • significativa pois a estrutura dos coñecementos previos condiciona os novos.
  • primordialmente práctica e estará baseada na resolución de problemas (retos).
  • funcional, con aplicación a situacións reais e conectadas coa contorna do alumnado.
• Os contidos traballaranse dun xeito operativo, práctico e comprensible, contextualizados na situación de aprendizaxe proposta.
• Favorecerase a adquisición de coñecementos relacionados entre si, abordados cun enfoque multicausal e favorecendo as estratexias interdisciplinares.
• Traballarase tanto de maneira individual como colectiva, promovendo a reflexión persoal por un lado e as dinámicas grupais de intercambio de ideas e aprendizaxe colaborativo polo outro.
• Terase en conta en todo momento unha perspectiva coeducativa, na que as nenas estean nun plano de igualdade cos nenos, especialmente nas dinámicas de participación grupal.
• Fomentarase o emprego das TIC no proceso de ensinanza-aprendizaxe.
• Empregaranse estratexias para traballar transversalmente os aspectos máis variados, dende a comprensión lectora ata a competencia dixital.
• Todo o proceso contará cunha retroalimentación e avaliación permanente.
• Respectaranse os diferentes ritmos de aprendizaxe e a diversidade do alumnado (DUA).