Un plan perfecto
Nesta situación de aprendizaxe proponse un reto final no que, a partir dunha situación real e da actualidade coma son noticias relacionadas coa saúde, o alumnado deberá crear un plan para mellorar a súa saúde e a da súa familia partindo da súa realidade familiar.
Traballaranse os hábitos saudables como a alimentación, a hixiene persoal, a hixiene do sono, a hixiene postural... e veranse os efectos positivos que van ter para o benestar físico, social e mental.
Utilizaranse desafíos físicos cooperativos como medio para aprender estes contidos. Deste xeito, conseguirase unha posta en práctica das habilidades sociais e da resolución de conflitos. É importante que o alumnado sexa consciente da importancia que ten o traballo en equipo para conseguir o reto, porque todos e todas son necesarios para conseguilo.
Os obxectivos desta situación de aprendizaxe son:
- Recoñecer os efectos beneficiosos dun estilo de vida activo e saudable.
- Fomentar condutas e comportamentos que melloren a saúde física, mental e social.
- Afianzar hábitos e rutinas sobre o coidado do corpo e a hixiene persoal.
- Coñecer e poñer en práctica medidas básicas de seguridade e primeiros auxilios na práctica deportiva.
- Desenvolver habilidades sociais traballando en equipo fomentando a resolución pacífica de conflitos.
- Realizar actividades en equipo de xeito cooperativo para mellorar as relacións interpersoais.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.
As situacións de aprendizaxe do proxecto cREAgal estrutúranse en cinco fases:
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.