Eixes da proposta didáctica
A área de Educación Física fundaméntase na adquisición das capacidades que contribúan ao desenvolvemento persoal e a unha mellor calidade de vida. É unha área que se dirixe ao coñecemento progresivo da conduta motriz e a adquisición de actitudes, valores e normas referentes ao corpo e ao movemento.
Esta área participa tamén na consecución de diversos fins educativos na etapa de Educación Primaria: a socialización, a autonomía, aprendizaxes básicas e mellora das posibilidades expresivas, cognitivas, comunicativas e lúdicas. A Educación Física está especialmente indicada para integrar todo tipo de alumnado e ademais resulta idónea para o tratamento da diversidade na aula, fomenta a coeducación e promove a igualdade de oportunidades para ámbolos sexos.
Debemos lembrar que a Educación Física non é unha simple aprendizaxe de movementos, senón un camiño cara á educación integral e que utiliza o movemento como axente pedagóxico, con diversas funcións: de coñecemento, de organización perceptiva, anatómico-funcional, estético-comunicativa, de relacións persoais, agonística, hixiénica, hedonista, de compensación e catártica.
Este REA contribúe a dous dos obxectivos principais da área:
- OBX3. Desenvolver procesos de autorregulación e interacción no marco da práctica motriz, con actitude empática e inclusiva, facendo uso de habilidades sociais e actitudes de cooperación, respecto, traballo en equipo e deportividade, con independencia das diferenzas etnoculturais, sociais, de xénero e de habilidade dos participantes, para contribuír á convivencia social e ao compromiso ético nos diferentes espazos en que se participa.
- OBX5. Valorar diferentes medios naturais e urbanos como contextos de práctica motriz, interactuando con eles, comprendendo a importancia da súa conservación desde un enfoque sustentable e adoptando medidas de responsabilidade individual durante a práctica de xogos, de actividades físico-deportivas e de ocio, para realizar unha práctica eficiente e respectuosa coa contorna e participar no seu coidado e mellora.
Abordar, con posibilidades de éxito, situacións motrices adaptadas e, en contornas diferentes, implica desenvolver un certo grao de empatía e actuar desde a prosocialidade, a través de accións que buscan tamén o benestar alleo, valorando a realidade asociada á práctica motriz e actuando sobre ela desde parámetros de liberdade exercida con responsabilidade, equidade, inclusión, respecto, solidariedade, cooperación, xustiza e paz. Tamén resulta preciso coñecer normas básicas de actuación e prevención de accidentes e primeiros auxilios para desenvolvernos, na nosa contorna máis inmediata, coa maior seguridade posible.
A situación de aprendizaxe está conectada cos seguintes Obxectivos de Desenvolvemento Sostible (ODS):
- ODS 3 - Saúde e benestar: porque a situación de aprendizaxe aborda medidas de prevención, primeiros auxilios e actividades físicas, ademais fomenta hábitos saudables que contribúen ao benestar físico e emocional do alumnado.
- ODS 4 - Educación de calidade: o obxectivo de fomentar o respecto pola diversidade e a inclusión na práctica deportiva, así como promover coñecementos sobre deportes adaptados, encaixa perfectamente con este ODS. Estamos a proporcionar unha educación inclusiva e equitativa.
- ODS 10 - Redución das desigualdades: darlle visibilidade aos deportes adaptados e aos deportistas que os practican axuda a reducir a discriminación e promover a igualdade de oportunidades para todas as persoas, tratando de reducir barreiras e desigualdades sociais.
- ODS 11 - Cidades e comunidades sostibles: coñecer a contorna próxima, como actuar en diferentes ámbitos, traballar a educación viaria e a accesibilidade están directamente relacionadas coa creación de espazos seguros e inclusivos para todas as persoas, independentemente das súas capacidades. Todo isto, encaixa dentro da idea de fomentar comunidades máis seguras e accesibles.