A metodoloxía do Recurso Educativo Aberto (REA) "Anda o tempo revolto", que aborda a historia da música desde a Idade Media ata o Século XX, está deseñada para proporcionar unha experiencia de aprendizaxe significativa, participativa e motivadora, seguindo os principios do Deseño Universal para a Aprendizaxe (DUA). Ao integrar o DUA con estratexias específicas de ensino musical, buscamos crear un ambiente inclusivo e equitativo onde todo o alumnado poida desenvolver as súas habilidades e apreciación pola música cultivada nos diferentes períodos históricos, tanto desde a práctica instrumental, vocal e dancística como desde a audición activa. O punto de partida é unha situación de aprendizaxe na que se deben realizar unha serie de actividades secuenciadas orientadas á consecución dun reto final.

Exploración activa da música: as actividades do REA promoven a participación activa do alumnado na exploración e descubrimento da música, a través de actividades prácticas como interpretación instrumental, vocal e dancística, así como a experimentación sonora. O alumnado interactúa dinamicamente co contido musical a través da audición musical activa.

Colaboración musical: fomentarase o traballo en equipo entre o alumnado para as interpretacións musicais, a lectura sobre base musical e a representación final do conxunto. As actividades do REA inclúen a interacción entre todo o alumnado do grupo.

Diversidade de enfoques e recursos: recoñecemos a diversidade de intereses e estilos de aprendizaxe do alumnado e ofrecemos unha variedade de enfoques e recursos musicais para satisfacer as súas necesidades. As actividades do REA proporcionan unha ampla gama de experiencias musicais adaptadas aos intereses e habilidades individuais do alumnado, incluíndo actividades multiniveladas que lles permitan seleccionar o nivel de dificultade máis axeitado para cada discente.

Tecnoloxía e innovación musical: integrando a tecnoloxía na experiencia musical, aproveitamos as ferramentas tecnolóxicas e os recursos interactivos para enriquecer a aprendizaxe musical do alumnado.

Avaliación formativa e reflexión: implementamos unha avaliación continua e formativa que permite ao alumnado reflexionar sobre o seu progreso e desenvolvemento musical, tanto interpretativo como receptivo e organizativo, así como o grao de implicación e pertenza a un grupo na elaboración dun obxectivo común. As actividades do REA inclúen momentos de reflexión,  autoavaliación e coavaliación onde o alumnado determina as súas habilidades e comprensión musical, tanto a través de listas de cotexo como de rúbricas.

Actividades multinivel: para abordar as diferentes necesidades de aprendizaxe do alumnado, ofrecemos actividades multiniveladas que lles permiten seleccionar a dificultade que mellor se adapte ás súas habilidades e intereses, tanto a nivel interpretativo como de rol dentro do grupo. A experiencia multinivel nas interpretacións musicais vén dada pola gradación da dificultade das partituras, por exemplo, para garantir que todo o alumnado participe e forme parte activa do conxunto.

A través desta metodoloxía centrada na música, buscamos inspirar e capacitar ao noso alumnado para que sexan persoas creativas e comprometidas, coñecendo e apreciando a diversidade da música ao longo dos séculos e do patrimonio cultural. Ao abordar as necesidades diversas do alumnado e promover unha cultura inclusiva, estamos traballando para reducir a brecha de xénero e crear un ambiente educativo equitativo e enriquecedor para todas as persoas.