Anda o tempo revolto é o terceiro dos Recursos Educativos Abertos (REAs) do proxecto cREAgal para a área de Música e Danza de 6º de Educación Primaria. Os contidos que imos tratar están relacionados coa historia da música desde a Idade Media ata o Século XX, dando resposta á Unidade Didáctica 3 PROENS e parte da Unidade Didáctica 4.

Propoñemos un reto que consiste en realizar un conto musicado con intermedios musicais para representar na festa de fin de curso. Nel traballaranse os períodos da historia da música e as súas principais características a través dun conto e da práctica instrumental, vocal e dancística.

A finalidade do noso reto é organizar unha pequena función sobre a historia da música e representala para o resto do alumnado como despedida da etapa de primaria.

Metas de aprendizaxe:

1. Descubrir a evolución da música desde a Idade Media ata o Século XX.
2. Realizar diferentes interpretacións musicais de cada un dos períodos detallados.
3. Comprender como a historia dun neno pode ser a historia de toda unha arte.
4. Valorar a conexión entre as artes, especialmente entre a música e a literatura.
5. Ordenar un conto sobre a historia da música.
6. Comprender que a música de cada época é unha representación da sociedade que a crea.
7. Representar un conto con intervencións musicais para Fin de Curso.
8. Valorar as diferentes manifestacións artísticas e musicais.