Eixes da proposta didáctica

Esta proposta didáctica está baseada nos eixes da materia "Tecnoloxía e dixitalización" de 2º de ESO:

- Aplicación da resolución de problemas mediante unha aprendizaxe baseada no desenvolvemento de proxectos (ABP).
- Desenvolvemento do pensamento computacional.
- Incorporación das tecnoloxías dixitais nos procesos de aprendizaxe e na natureza interdisciplinaria propia da tecnoloxía.
- Fomento de actitudes como a creatividade, a cooperación, o desenvolvemento tecnolóxico sostible ou o emprendemento.

Este recurso educativo aberto (REA) promove activamente a consecución dos Obxectivos de Desenvolvemento Sostible (ODS), conectando o traballo na aula co mundo real e coas grandes transformacións globais. En concreto, contribúe ao ODS 4: Educación de calidade, ao apostar por metodoloxías activas como a aprendizaxe baseada en proxectos (ABP) ou a aprendizaxe cooperativa. A través delas, o alumnado aprende facendo, desenvolve competencias clave como o pensamento computacional, a resolución de problemas, o traballo colaborativo e a comunicación efectiva, e participa nun entorno inclusivo que garante a equidade no acceso ao coñecemento.

Así mesmo, está estreitamente ligado ao ODS 9: Industria, innovación e infraestrutura, xa que o deseño e programación dun robot orientado á exploración espacial permite simular na aula unha contorna profesional de I+D. Esta experiencia complétase coa asignación de roles propios do mundo laboral real formando parte dun equipo e o uso de kits tecnolóxicos.

Finalmente, responde ao ODS 17: Alianzas para acadar os obxectivos, porque fomenta o traballo en equipo, a toma de decisións compartida e o liderado distribuído.

Contidos, obxectivos específicos e competencias clave

Este REA, en relación coa programación didáctica de referencia publicada en PROENS para a materia de "Tecnoloxía e dixitalización" de 2º de ESO, contextualízase na unidade didáctica final "Sistemas de control e robots". Pola súa situación, despois de traballar o resto de bloques do currículo, pretende tamén que o alumnado integre o aprendido nas unidades previas da programación anual.

O recurso englóbase fundamentalmente nos bloques de contido 3. Elementos de máquinas, sistemas e robots e 4. Programación, control e robótica que abarcan os fundamentos de algorítmica para o deseño e o desenvolvemento de aplicacións informáticas sinxelas para ordenador e dispositivos móbiles, seguindo coa automatización programada de procesos, a conexión de obxectos cotiáns á internet e a robótica.

Contidos	Bloque da materia
Estratexias, técnicas e marcos de resolución de problemas en diferentes contextos e as súas fases. Estratexias de procura crítica de información para a investigación e a definición de problemas expostos. Emprendemento, resiliencia, perseveranza e creatividade para abordar problemas desde unha perspectiva interdisciplinaria.	Bloque 1
Uso e mantemento de ferramentas. Técnicas de mecanización de materiais na construción de obxectos e prototipos. Respecto das normas de seguridade e hixiene.	Bloque 2
Compoñentes e funcionamento dun sistema de control ou robot sinxelo: estrutura, mecánica, sensores, actuadores, controladores e alimentación. Deseño e montaxe de sistemas de control ou robots para a resolución de problemas técnicos.	Bloque 3
Sistemas de control programado: programación sinxela de dispositivos. Introdución á Internet das cousas (IoT). Fundamentos da robótica: control programado de robots de maneira física ou por medio de simuladores. Resolución de retos e desafíos de robótica sinxelos. Autoconfianza e iniciativa: o erro, a reavaliación e a depuración de erros como parte do proceso de aprendizaxe.	Bloque 4
Vocabulario técnico apropiado. Habilidades básicas de comunicación interpersoal. Pautas de conduta propias da contorna virtual. Ferramentas dixitais para a elaboración de documentación técnica relativa a proxectos. Ferramentas de edición e creación de contidos: instalación, configuración e uso responsable.	Bloque 5

Tendo en conta o anterior, este recurso céntrase principalmente nos seguintes obxectivos da materia:

Obxectivos	Descrición
OBX 1	Buscar e seleccionar a información adecuada proveniente de diversas fontes, de maneira crítica e segura, aplicando procesos de investigación, métodos de análise de produtos e experimentando con ferramentas de simulación, para definir problemas tecnolóxicos e iniciar procesos de creación de solucións a partir da información obtida.
OBX 2	Abordar problemas tecnolóxicos con autonomía e actitude creativa, aplicando coñecementos interdisciplinarios e traballando de forma cooperativa e colaborativa, para deseñar e planificar solucións a un problema ou necesidade de forma eficaz, innovadora e sostible.
OBX 3	Aplicar de forma apropiada e segura distintas técnicas e coñecementos interdisciplinarios utilizando operadores, sistemas tecnolóxicos e ferramentas, tendo en conta a planificación e o deseño previo para construír ou fabricar solucións tecnolóxicas e sostibles que dean resposta a necesidades en diferentes contextos.
OBX 4	Describir, representar e intercambiar ideas ou solucións a problemas tecnolóxicos ou dixitais, utilizando medios de representación, simboloxía e vocabulario axeitados, así como os instrumentos e os recursos dispoñibles, e valorando a utilidade das ferramentas dixitais para comunicar e difundir información e propostas.
OBX 5	Desenvolver algoritmos e aplicacións informáticas en distintas contornas, aplicando os principios do pensamento computacional e incorporando as tecnoloxías emerxentes, para crear solucións a problemas concretos, automatizar procesos e aplicalos en sistemas de control ou en robótica.
OBX 6	Comprender os fundamentos do funcionamento dos dispositivos e aplicacións habituais da súa contorna dixital de aprendizaxe, analizando os seus compoñentes e funcións e axustándoos ás súas necesidades para facer un uso máis eficiente e seguro destes e para detectar e resolver problemas técnicos sinxelos.

A continuación inclúense os descritores das competencias clave estipuladas pola normativa traballadas neste recurso.

Competencias clave	Clave dos descritores operativos
Competencia en comunicación lingüística (CCL)	CCL1, CCL3
Competencia Plurilingüe (CP)	CP2
Competencia matemática, en ciencia, tecnoloxía e enxeñería (STEM)	STEM1, STEM2, STEM3, STEM4, STEM5
Competencia dixital (CD)	CD1, CD2, CD3, CD4, CD5
Competencia persoal, social e de aprender a aprender (CPSAA)	CPSAA1, CPSAA3, CPSAA4, CPSAA5
Competencia emprendedora (CE)	CE1, CE3
Competencia en conciencia e expresión culturais (CCEC)	CCEC3, CCEC4