"Entramos en materia" é un REA (Recurso Educativo Aberto) deseñado para o alumnado de 6º de Educación Primaria, cun enfoque práctico e cooperativo.

O obxectivo principal deste REA é que o alumnado desenvolva un proxecto de deseño e investigación, que consiste na creación dun prototipo capaz de evitar que un ovo escache ao caer. Este reto permite aplicar coñecementos previamente traballados sobre as propiedades e características da materia e enerxía, entre os que se atopan a densidade, a flotabilidade, os cambios de estado e as fontes de enerxía, entre outros. Tamén se traballarán as técnicas de indagación científica a través da aplicación do método científico e do Design Thinking á vez que se fomenta o traballo en equipo e a resolución de problemas mediante a creación de prototipos e experimentos.

A situación de aprendizaxe permitirá ao alumnado explorar as características e as propiedades da materia para despois aplicalo á práctica a través da identificación de materiais que poidan ser utilizados para protexer o ovo, así como na investigación das diferentes formas de enerxía que se poden empregar para mellorar a protección do prototipo ante o impacto. O alumnado traballará tanto de forma individual como en pequeno e gran grupo, realizando experimentos e actividades interactivas que lles permitan testar as súas ideas e mellorar os seus prototipos.

Durante o proceso de construción do prototipo, os estudantes formularán preguntas e realizarán predicións sobre como distintos materiais e formas de enerxía poden influír na protección do ovo, realizarán experimentos guiados para probar as súas hipóteses e analizarán os resultados obtidos, comunicando as súas conclusións de forma clara e precisa utilizando a linguaxe científica.

O traballo cooperativo será fundamental ao longo deste REA, xa que o alumnado deberá colaborar ao longo do mesmo para a realización das distintas actividades e experimentos e, por suposto, para a construción do prototipo. Entre todos deberán explorar, deseñar e probar diferentes opcións, utilizando recursos dixitais e metodoloxías de pensamento computacional para crear solucións innovadoras. Ao final do proceso, os estudantes presentarán os seus prototipos e comunicarán os pasos seguidos e os resultados obtidos, explicando como resolveron o reto de protexer o ovo utilizando os principios aprendidos sobre a materia e a enerxía e facendo unha demostración do funcionamento. 

Metas de aprendizaxe do REA "Entramos en Materia":

• Identificar e analizar as propiedades da materia para comprender como os materiais poden influír na protección dun obxecto ante un impacto.
• Recoñecer as diferentes formas de enerxía e investigar como aplicalas para mellorar a protección do ovo no momento do impacto.
• Formular preguntas e realizar predicións baseadas en observacións e coñecementos previos, aplicando o método científico.
• Deseñar, analizar e comunicar os resultados dos experimentos e produtos finais realizados utilizando linguaxe científica, explicando os procesos e avaliando posibles melloras ou novos retos para futuros proxectos.
• Traballar en equipo para deseñar, probar e mellorar prototipos utilizando recursos dixitais e técnicas de pensamento de deseño e computacional.
• Crear un prototipo funcional que evite que un ovo escache ao caer, aplicando os coñecementos sobre propiedades da materia e enerxía.