Recursos materiais necesarios

Neste REA inclúense todos os materiais necesarios para o seu desenvolvemento, tanto para o alumnado como para o profesorado.

Os documentos pódense atopar en dous formatos:

Editables (.odt): teñen como finalidade que o profesorado poida adaptar as actividades e tamén que o alumnado poida utilizalas para realizar os exercicios directamente, sen necesidade de imprimilos.

Imprimibles (.pdf): teñen como finalidade que se poidan imprimir e proxectar sen cambios de formato.

Proposta de agrupamentos para actividades grupais

En xeral, os agrupamentos están propostos para pequenos grupos de 3 ou 4 persoas, con niveis, motivacións e modalidades de aprendizaxe heteroxéneas.

Algunhas actividades están propostas para o traballo en parellas, tal como se especifica na presentación das mesmas.

Existen tamén actividades orientadas ao traballo individual.

Enfoque multinivel do REA

O enfoque multinivel está presente na totalidade do REA "¡No nos mires, iguálate!", se ben ás veces non aparece explicitamente como tal. Así, por exemplo, cando se propoñen diferentes situacións para analizar a posible desigualdade de xénero na fase 2.1 ("¿Qué sabemos de igualdad?"), o alumnado ten a posibilidade de escoller entre 10 situacións con distinto nivel de complexidade.

Por outra banda, o enfoque multinivel aparece reflectido de maneira explícita nas fases 2.2 ("¿Qué sabemos de comunicación?"), 3.2 ("La lengua es un sistema de comunicación") e no reto final (4. "¡Una campaña por la igualdad!"). Nestas tarefas, o alumnado (coa posible orientación do profesorado) escollerá a opción que mellor se adapte ao seu perfil, tendo en conta que todas elas conducen, por igual, a alcanzar os obxectivos previstos na situación de aprendizaxe. Cómpre sinalar que, nos tres casos, a orde de presentación dos 3 niveis é correlativa a orde crecente de dificultade.

Produtos finais

Hai tres modalidades diferentes de produto final:

- un cartaz publicitario, no que prima a imaxe e a forza do logo;

- unha cuña radiofónica, un produto orientado á lingua oral e que require unha elaboración mais complexa;

- un anuncio televisivo ou spot, o produto de maior complexidade na súa realización.

Cada unha destas modalidades correspóndese cun distinto nivel de dificultade, en orde crecente tal como aparecen aquí.

Na fase 4 do REA do alumnado están explicados os pasos específicos para a realización do produto final escollido, con exemplos e axudas. Tamén teñen unha rúbrica que lles permite ir orientando o proceso creativo e verificando o cumprimento dos aspectos esixidos.

Proposta de temporalización do reto

• Sesión 1: preproducción
  • Na primeira sesión, ademais de decidir o formato que realizarán, crearán a través dunha chuvia de ideas o slogan do seu anuncio e un esbozo da súa composición.
• Sesións 2 e 3: produción creativa 
  • Desenvolverán  o deseño esbozado, escribirán o guión e decidirán e buscarán os elementos comunicativos que precisen.
• Sesión 4: realización
  • Na cuarta sesión rematarán a creación de recursos propios previstos no deseño: maquetarán o cartaz ou gravarán, tras varios ensaios, a cuña publicitaria ou o plano secuencia que conformará o anuncio de televisión.
• Sesión 5: posprodución
  • O quinto día dedicarase á posprodución do produto, é dicir, a montaxe e axuste dos elementos sonoros, gráficos e outros detalles finais cos que finalizarán o seu anuncio. 

Transversalidade

Ademais da temática da igualdade entre homes e mulleres, que é un contido transversal, é interesante suliñar así mesmo o carácter transversal da situación de aprendizaxe.

Por unha banda, este REA transcende a materia de Lingua castelá e Literatura posto que parte da observación e da análise das dinámicas do centro educativo. Ademais, no momento de presentar as campañas a toda a comunidade educativa, xorde unha interacción cos demais grupos, materias e docentes.

Por outra banda, a colaboración interdepartamental enriquece o traballo a desenvolver e pode darse de xeito moi natural, especialmente cos departamentos de Tecnoloxía e Educación Plástica e Visual na realización dos retos finais, de Orientación co tratamento das desigualdades no centro e de Matemáticas na medición do impacto posterior.

Avaliación formativa

A avaliación formativa está presente no REA nas actividades de autoavaliación e coavaliación, así como na heteroavaliación levada a cabo polo profesorado.

É interesante resaltar a importancia de avaliar durante o proceso, dando claves para o progreso pero sen caer na cualificación numérica ou na avaliación cualitativa. Trátase de ver que está acadado e que esta aínda en proceso, para poder orientar os esforzos aí onde son necesarios e, de ser o caso, reorientar o traballo.