Recursos materiais necesarios

Neste REA están incluídos os materiais necesarios para o seu desenvolvemento. Facilítanse tanto en formato pdf como en formato editable, para que o profesorado que así o desexe poida modificalos ou adaptalos.

Ademais, o alumnado precisará ordenador con conexión a internet e unha gravadora (que pode ser un teléfono móbil) para elaborar o "vídeo gancho" e acceder a aplicacións dixitais da súa elección para a elaboración dos enigmas. Como materiais complementarios de carácter opcional para o deseño das probas, destacan os seguintes:

• Cúter ou tesoiras.
• Codificador de cores: lupa ou unhas lentes con papel celofán vermello.
• Mensaxes invisibles: bolígrafo invisible e unha lanterna de luz azul.
• Rascas: pintura tipo plastidecor de cor branca, pintura acrílica negra, unhas pingas de xabón tipo Fairy, un bote pequeno e un pincel.

Proposta de agrupamentos para actividades grupais

Para a realización do reto, recoméndase que o profesorado deseñe 2 grupos estables, que poderá dividir en subgrupos de 4 ou 5 persoas en actividades concretas. Para garantir que o traballo en equipo sexa efectivo, deberá ter en conta os seguintes criterios:

• Heteroxeneidade en canto a nivel de competencia lingüística e de creatividade, diversidade de estilos de aprendizaxe ou diferente grao de motivación.
• Promoción da cohesión e a cooperación.
• Para garantir o equilibrio na participación, é recomendable a asignación de roles para funcións como a coordinación, a creación de cada enigma, o deseño das probas, a verificación do seu funcionamento, a portavocía, etc.

As actividades individuais están deseñadas para que o alumnado consolide os contidos teóricos. Estas tarefas facilitarán que o alumnado reforce os seus coñecementos de Gramática para abordar con éxito a elaboración e a resolución dos enigmas do escape room.

Produtos finais

É fundamental que o alumnado coñeza con claridade o proxecto desde o principio. Unha presentación motivadora mellora a implicación do alumnado porque sabe que debe facer e con que obxectivo traballa. Neste caso, os produtos finais esperados son os seguintes:

• Deseño dun escape room con temática de misterio que ten como obxectivo promover a reflexión sobre a lingua.
• Resolución dun escape room para que o alumnado poña práctica todos os seus coñecementos sobre Gramática.

Enfoque multinivel do reto

O enfoque multinivel permite que todo o alumnado -independentemente do seu punto de partida- descubra, analice e aplique coñecementos gramaticais mediante retos colaborativos que integran de maneira secuenciada tanto as competencias comunicativas como a reflexión lingüística.

Por iso, indícanse a continuación tres niveis de dificultade:

Nivel de dificultade	Deseño e resolución do escape room
Nivel 1. Básico Descubrir as pezas da lingua	Competencias: Identificar categorías gramaticais. Recoñecer formantes. Aplicar adecuadamente as regras xerais de acentuación en palabras agudas, graves e esdrúxulas. Usar correctamente as grafías b/v. Exemplos de probas: Crucigrama. Sopa de letras. Rascas. Mensaxes invisibles.
Nivel 2. Intermedio Entender como funciona a estrutura	Competencias: Diferenciar funcións sintácticas básicas na oración simple. Asociar as categorías gramaticais ao tipo de texto (narrativo ou descritivo). Recoñecer diferencias entre oralidade e escritura en textos reais. Aplicar adecuadamente as regras xerais de acentuación en ditongos e hiatos. Exemplos de probas: Disco cifrado. Xornais falsos. Globos con enigmas. Codificador de reixa.
Nivel 3. Avanzado Reflexión gramatical profunda e creativa	Competencias: Manipular e xerar estruturas complexas. Converter palabras simples en derivadas ou compostas. Avaliar o uso dos formantes das palabras na creación de significado. Valorar os efectos dos signos de puntuación en textos reais. Reflexionar sobre o esquema da oración simple. Exemplos de probas: Audios e códigos QR. Conversas falsas de Whatsapp. Codificador de cores.  Noticias falsas de revistas.