Recursos materiais necesarios

Recomendamos a previa selección das novas e páxinas web específicas,  para un filtrado e selección de información real.

Tamén cómpre explicar ao alumnado que os textos literarios que se proporcionen deberán respectar a licenzas de autoría.

Proposta de agrupamentos para actividades grupais

Neste REA propóñense actividades individuais e grupais, considerando as seguintes premisas:

• É recomendable a creación de grupos de 3-5 alumnos e alumnas, de xeito que elixan ou sexan asignados polo profesorado, cada un dos retos propostos. Logo terán que expoñer o seu resultado ao resto de compañeiras e compañeiros.
• O groso do traballo será realizado en actividades grupais onde se pretende que o alumnado traballe de forma cooperativa e colaborativa. Con isto, procuramos que aprendan a coordinarse na realización de tarefas e aumenten a súa autonomía persoal. Debemos procurar que os grupos sexan diversos e heteroxéneos, na procura do traballo en equipo, para que o alumnado aprenda a tomar decisións e accións conxuntamente, promovendo a “democracia de grupo”. Para iso, recoméndase ao profesorado que implemente este REA na súa aula considerando as seguintes pautas:
  • Organiza ao alumnado en función das súas diferentes necesidade e intereses, para crear equipos nos que cada un pon o seu gran de área, dende os máis proactivos, líderes, organizativos aos máis pasivos, non colaborativos etc.
  • Asigna a cada alumna ou alumno unha función no grupo na que amose as súas potencialiades.
  • Crea un clima de traballo positivo e participativo, poñendo en valor os progresos e aconsellando nas dificultades.

Produtos finais

O produto final é un tríptico que contén varias actividades:

• A elaboración dun poema con temática sobre o turismo poñendo en valor aspectos coma o respecto ao patrimonio, o turismo sostible ou código de boas prácticas.
• A elaboración dunha lenda/texto narrativo situada en Santiago ou na localidade onde se atope o alumnado
• Unha descrición dun conxunto de actividades que se poden realizar en Santiago ou noutra localidade.

A presentación deste produto final pode realizarse con diferentes formatos, incidindo así no concepto DUA: unha gravación con Audacity, unha ligazón a través de códigos QR, un traballo de exposición en formato texto, un vídeo

Enfoque multinivel do reto

Dentro deste recurso educativo podemos levar a cabo un enfoque multinivel dos retos e tamén do produto final (tríptico turístico). 

O tríptico ten que promover a localidade dun xeito respectuoso co medio e coas persoas que alí habitan. Hai que ter en conta o concepto de "turismo devagar" e incluír os seguintes tres elementos:

1. Unha lenda (narración). O alumnado preguntará na casa que lendas coñecen e traerá un resumo á aula para compartir co resto do grupo. Esta lenda pode estar en formato escrito ou mesmo en audio ou vídeo.
2. Unha descrición (poema ou canción) da localidade con recursos literarios. Poderá empregarse tamén o formato de audio ou vídeo como variable ao escrito ou como formato único.
3. Pequenos textos informativos sobre actividades que se poden facer na localidade ou arredores, sobre os lugares de interese e sobre produtos típicos da zona. Do mesmo xeito que nos casos anteriores, este elemento poderá realizarse en formato de audio ou vídeo.

Respectando o enfoque multinivel, este tríptico non ten que ser un produto final cun formato único escrito, senón que pode ser enfocado a través da utilización de todos aqueles recursos audiovisuais cos que conte o centro educativo (gravación de vídeo, audio, pódcast…).

Como contido extra, o alumnado poderá deseñar un slogan, un código de boas condutas para visitantes ou incluír unha curiosidade sobre o lugar onde viven.

Cando pensamos nun tríptico turístico, imaxinamos o formato impreso unicamente, mais podemos ofrecer diferentes posibilidades ao noso alumnado co fin de axudar na realización do reto. Por iso, outras posibilidades serían: un vídeo, unha gravación (audio) ou mesmo unha presentación en formato dixital, sempre engadindo os tres elementos mencionados, sexa cal sexa o formato elixido.