A creación deste REA (Recurso Educativo Aberto) englóbase no marco do proxecto cREAgal que se pode consultar na guía do proxecto.

A área de Lingua Castelá e Literatura, xunto coas de Lingua Galega e Literatura e Lingua Inglesa, son esencialmente instrumentais, cun gran peso social. É por iso que neste REA o reto que se propón achega ao alumnado a aspectos sociais do seu interese e propios deste século XXI, coa finalidade de mellorar a súa capacidade de análise da información e da súa actitude crítica, activa e participativa como membros dunha sociedade.

Por unha banda, no que respecta á proposta metodolóxica para a materia segundo o aplicativo PROENS, pódense destacar as seguintes liñas:

• Aprendizaxe cooperativa: o deseño de tarefas en grupo require comunicación entre iguais, escoita de ideas, aprendizaxe de normas de convivencia, etc. que potencian o desenvolvemento da linguaxe; permitindo a cada individuo desenvolver as súas capacidades específicas.
• Aprendizaxe significativa: as propostas terán unha vinculación directa co alumnado de forma que sexa para eles algo ligado coa súa realidade.
• Ensinanza individualizada: complementariamente ao traballo cooperativo, os docentes proporcionaremos tarefas e ensinanzas a cada un dos alumnos en función das súas capacidades e necesidades.
• Entorno multimedia: a linguaxe está presente en distintos formatos como por exemplo: directo, a través de material impreso, a través de medios electrónicos visuais e sonoros. Desenvolveranse destrezas de comunicación oral e escrita nestes distintos soportes de maneira equilibrada.
• Autoavaliativo: nas tarefas individuais, así como nas colectivas, será o propio alumno e alumna quen revise e avalíe a súa produción na busca de erros e de mellora comunicativa.
• Progresividade e consolidación: todo o aprendido en cada momento vai enriquecer o xa adquirido anteriormente. Deste xeito irán enriquecendo as capacidades comunicativas, e o desenvolvemento curricular no curso reforza e enriquece o adquirido no curso anterior.
• Alfabetización mediática e informacional: dedicarase unha porcentaxe de tempo non inferior ao 25% á aprendizaxe e práctica de procura de información, de coñecemento da organización dos contidos (en biblioteca, en internet, na contorna) e no desenvolvemento competencial no manexo de ferramentas TIC, no proceso de construción do coñecemento de forma activa por parte do alumnado.
• O acceso á literatura farase a través do fomento do hábito lector, para o que se conta co momento lector diario, así como o recollido no proxecto lector do centro.

Por outra banda e de forma complementaria á proposta anterior, atopamos a concreción metodolóxica deste REA coas seguintes liñas centrais:

• O uso dunha temática significativa e relacionada coa súa realidade, que está vencellada a aspectos de interese para o alumnado e que contribúe a acadar os obxectivos de área a través do reto que se propón.
• Accesibilidade cognitiva a través de DUA, o que permite a eliminación de barreiras ao incluír aspectos como lectura facilitada, contido alternativo en formato audio e tamén a posibilidade de apoio visual.
• Inclusión e diversidade na aula e a personalización da aprendizaxe dadas a oferta de actividades multinivel, os modelos en formato ecolóxico e imprimible... opcións na representación, expresión e participación (tanto en formatos como en estilos).
• Atender aos distintos estilos e ritmos de aprendizaxe nas propostas de realización das distintas tarefas.
• Autonomía no proceso de ensino-aprendizaxe, no que o erro forma parte da aprendizaxe, e o carácter competencial dos criterios de avaliación permiten atender tanto ao produto final esperado como aos procesos e actitudes. A autoavaliación e retroalimentación colectiva é construtiva e permite a mellora de xeito progresivo.
• Usar distintas modalidades de agrupamento: traballo individual, en pequeno grupo ou en gran grupo para favorecer as interaccións do grupo-aula.

Finalmente, engadir que o proceso de desenvolvemento desta situación de aprendizaxe, con estas propostas metodolóxicas en conxunto, pretende favorecer no alumnado a súa capacidade creativa, ademais de darlle a importancia do impacto que xera o resultado obtido na súa comunidade educativa.