Este REA (Recurso Educativo Aberto) correspóndese coa unidade 9 da área de Lingua Castelá e Literatura (unidades modelo en PROENS), e está relacionado de forma transversal coa unidade 5 sobre "Enerxía e materia" da área de Ciencias da Natureza.  Está deseñado co fin de que o alumnado integre a aprendizaxe teórica cunha aprendizaxe vivencial, arredor da prensa escrita en distintos soportes. Na situación de aprendizaxe, o alumnado deberá gravar o seu primeiro programa tipo "magacín divulgativo" con distintas seccións sobre o medioambiente.

Estudarán as noticias como parte de textos dentro da prensa escrita, repasarán os tipos de palabras invariables e como usar correctamente os signos de puntuación á hora de realizar unha boa redacción, así como as palabras compostas que tantas veces usamos no noso día a día.

Para o desenvolvemento dos contidos deste REA, tan importante é o traballo individual como o traballo en grupo, favorecendo as relacións interpersoais, a xestión de conflitos e a consecución de acordos e de metas en colaboración. 

As metas de aprendizaxe son:

1. Coñecer e traballar con diferentes medios de comunicación e información, tanto escritos como orais.
2. Crear un programa de televisión con seccións, elaborando o guión minutado.
3. Resumir por escrito noticias simples, aprendendo as mellores estratexias de planificación e redacción.
4. Identificar posibles usos discriminatorios da linguaxe que poidan existir na prensa escrita.
5. Recoñecer algunhas categorías gramaticais, especialmente as preposicións, as conxuncións e os adverbios.
6. Coñecer e integrar palabras compostas.
7. Coidar a ortografía e o uso dos signos de puntuación nos seus escritos.