Este REA (Recurso Educativo Aberto) ofrece ao alumando un primeiro achegamento á tecnoloxía e introduce aos estudantes no deseño de pezas, tanto en 2D como en 3D, así como á fabricación dixital de pezas sinxelas empregando unha impresora 3D e/ou unha cortadora láser.

A situación de aprendizaxe ofrece ao alumnado o reto de deseñar e construír entre toda a clase as pezas dun xadrez empregando a metodoloxía propia do método de proxectos. Ao tratarse da primeira unidade didáctica á que se enfronta o alumnado na materia de Tecnoloxía e Dixitalización, este REA tamén conta con unha avaliación inicial e integra contidos que facilitan un primeiro achegamento á esta materia e ao análise de obxectos.

Estudaremos as formas xeométricas básicas, a representación de pezas acoutadas e a escala en 2D e a modelaxe en 3D, coa axuda de dúas aplicacións informáticas: Libreoffice Draw e Tinkercad. Estes procesos de representación facilitan a introdución á fabricación dixital, que pode realizarse ou ben mediante a impresión 3D ou mediante unha cortadora láser.

As metas de aprendizaxe son:

1. Analizar obxectos tecnolóxicos sinxelos empregando diferentes puntos de vista.
2. Recoñecer a influencia da tecnoloxía na sociedade, valorando a importancia dun desenvolvemento sostible.
3. Comprender e utllizar conceptos básicos de deseño e debuxo técnico.
4. Deseñar obxectos sinxelos en 3D e 2D. Empregar aplicacións para o deseño 3D e 2D.
5. Materializar obxectos sinxelos mediante impresión 3D e/ou cortadora láser. Valorar de forma crítica as achegas destas novas tecnoloxías á sociedade.