O REA "Sin miedo a hacer clic" está deseñado para que o alumnado de 1º ESO se introduza no uso correcto dos recursos informáticos, sexa capaz de identificar os riscos máis comúns da Internet e poda actuar de xeito seguro ante eles. Para iso, o alumnado deberá tomar un papel activo e deseñar unha pequena campaña de concienciación para informar, ás persoas máis vulnerables da súa comunidade, sobre o bo uso e os riscos da rede. Complétase a actividade difundindo a campaña, enviando os documentos informativos ao colexio de Primaria, unha residencia de maiores, asociacións na vila, etc.

O alumnado traballará en equipo, formando pequenos grupos de especialistas en ciberseguridade, responsables de detectar os riscos, ameazas e ataques máis habituais, así como posibles dificultades no manexo de dispositivos dixitais que poida ter o público obxectivo.

Pretendemos que o alumnado sexa capaz de elaborar documentos sinxelos como infografías, dípticos ou trípticos que sinteticen e presenten, dunha maneira atractiva, todo o coñecemento que puidesen recompilar de diversas fontes, para sensibilizar á súa comunidade dos riscos da Internet e de como protexerse deles tomando conciencia, tanto da importancia de ter redes seguras como da de dinamizar e informar os colectivos máis débiles e sensibles dos perigos das redes.

As diferentes fases do recurso foron elaboradas tendo en conta os principios do Deseño Universal para a Aprendizaxe (DUA). A información preséntase en distintos formatos (textual, visual, audiovisual), ofrecendo múltiples vías de representación, expresión e implicación, co obxectivo de chegar ao maior número de estilos e necesidades de aprendizaxe. Así mesmo, as actividades e o propio reto final son multinivel.

Este REA constitúe unha proposta motivadora e contextualizada que permite ao profesorado introducir a aprendizaxe e o uso das TIC desde unha narrativa inspiradora e transversal, conectando a tecnoloxía co coñecemento científico e co desenvolvemento das competencias.