Despois de todo o traballado na fase 3, xa sabedes moito sobre a Ilustración, a súa crítica ao Antigo Réxime, o despotismo ilustrado e a arte deste período histórico.

Agora estades preparados e preparadas para o reto final. É o momento de demostrar o aprendido. Adiante!

Ao comezo, na fase 1, formulábase esta situación de aprendizaxe "Imaxina que formas parte dun equipo creativo dunha empresa especializada no deseño de exposicións e materiais didácticos para museos e centros educativos. O teu novo encargo é especial: crear un museo itinerante que percorrerá institutos para axudar a comprender como as ideas da Ilustración puxeron en cuestión o Antigo Réxime e transformaron a maneira de pensar da sociedade europea."

Este museo non quere limitarse a mostrar datas e conceptos, senón que pretende contar unha historia: como a defensa da razón, da educación, do progreso e da crítica ao poder absoluto influíu tanto en persoas concretas como nas manifestacións artísticas do século XVIII e da primeira metade do século XIX. Ao mesmo tempo, tamén busca reflexionar sobre os límites e as contradicións da Ilustración, especialmente no que respecta ao papel das mulleres e ás desigualdades que permaneceron.

Como parte do equipo responsable da exposición, terás que investigar, seleccionar, interpretar e crear contidos que permitan ao público entender esa época de cambios. Para iso, poderás elixir entre tres retos diferentes, todos eles necesarios para construír o museo e todos vinculados aos mesmos temas históricos. Cada reto achega unha mirada distinta: as persoas que pensaron e gobernaron, as obras de arte que transmitiron ideas e críticas, e a creación artística como forma de expresar a Historia.

O resultado final será unha exposición colectiva, na que cada achega axudará a explicar como a arte e o pensamento ilustrado contribuíron a cuestionar o Antigo Réxime e a abrir o camiño cara ao mundo contemporáneo.

Para resolver o reto final tedes que escoller unha das actividades propostas.

Nos seguintes apartados tedes a información detallada para poder superar cada unha das opcións de reto.

Ánimo, vós podedes!