Hoxe na aula preguntaron que significa o termo “democracia”, que tres poderes a sustentan, que diferenzas hai entre unha ditadura e unha democracia ou cal é o sistema político que temos no noso país. A maior parte do alumnado non soubo contestar ou deu respostas incompletas. Despois vimos unha serie de imaxes de obras de arte relacionadas coas sociedades de séculos XVIII e XIX e tampouco soubemos o que expresaban ou o seu significado. 
Comentáronnos que diariamente hai novas relacionadas con sucesos en todo mundo que fan cuestionar a democracia conseguida ao longo dos últimos séculos. O avance de ideas autoritarias en moitos países do noso contorno e o descoñecemento que algunhas persoas teñen sobre o funcionamento da democracia están deixando en segundo plano valores como a liberdade de expresión, a pluralidade política ou o dereito internacional. Tamén nos explicaron, que a arte é un medio para expresar ideas políticas, para facer denuncia social ou para facer propaganda do poder. 
O coñecemento das ideas Ilustradas e das ideas liberais están relacionadas co nacemento e coa consolidación dos primeiros sistemas liberais e democráticos europeos a partir dos séculos XVIII e, sobre todo, do XIX. Así mesmo, a arte deses séculos amosa os principais acontecementos políticos e os cambios sociais.
Propúxose un reto: imaxina que formas parte dun equipo creativo dunha empresa que deseña exposicións e materiais didácticos para museos e centros educativos. A túa nova encarga é especialmente importante: crear un museo itinerante que percorrerá centros de secundaria para axudar a entender como as ideas da Ilustración puxeron en cuestión o Antigo Réxime e transformaron a maneira de pensar das persoas.