Nervios!
Sabela levaba toda a mañá sentindo un exército de bolboretas loitando dentro do estómago. No pupitre os dedos bailaban no bordo das cartolinas que preparou con tanto esmero. Hoxe tócalle a ela. Expoñer en público é un acto de valentía especialmente cando sabes que hai compañeiros que se burlan de ti ou do teu traballo como lle pasou onte á compañeira de Sabela. Por iso o papel dos que escoitan é tan importante como o da persoa que fala. Detrás de cada exposición hai horas de investigación, lectura... de traballo. Ti sábelo ben!
O respecto é fundamental. Todos pasamos por eses momentos de nerviosismo antes da exposición. Tratemos os demais como nos gustaría ser tratados. O éxito dunha exposición oral non depende só de quen fala, senón tamén de quen sabe escoitar con respecto.
É o momento de poñer en práctica todo isto. Comezan as vosas exposicións! Prepara o teu material para cando sexa a túa quenda.
Lectura facilitada
Sabela está moi nerviosa.
Sente bolboretas no estómago.
Ten as cartolinas preparadas. Hoxe ten que falar diante da clase.
Falar en público é difícil. Hai compañeiros que se burlan, como pasou onte.
Por iso é importante escoitar con atención.
E respectar os demais.
Cada exposición leva moito traballo.
Todos nos poñemos nerviosos antes de falar. Debemos tratarnos ben.
Unha boa exposición é falar e escoitar.
Agora comezan as exposicións.
Prepara o material para cando sexa a túa quenda.
Audio
Pódeche axudar
Lembra estes consellos para facer unha boa exposición oral:
- Non leas. Podes botar un ollo ás notas pero non ler continuamente.
- Mantén unha boa postura. Debes estar relaxado pero coa postura correcta.
- Vocaliza, varía o ton de voz e fala con fluidez.
- O contacto visual é importante, non o esquezas. Se non es capaz, mira o fondo da aula.
- Se quedas en branco, non desesperes, respira profundamente, pide desculpas e retoma a exposición.
- Se é un compañeiro ou compañeira quen queda en branco, bótalle unha man.
Lectura facilitada
Lembra estes consellos:
Non leas todo o tempo.
Mantén unha boa postura.
Fala claro.
Cambia o ton de voz.
Mira o público. Se non podes, mira ao fondo da aula.
Se esqueces algo, non pasa nada. Respira fondo e continúa.
Se alguén esquece algo, axúdao.
