Lembras que xa saíras á escena?

Tes boa memoria ou es desas persoas que a media mañá xa non lembra o que almorzou?

Ímosche axudar!

Se en 1º da ESO empregastes os recursos educativos abertos do Proxecto cREAgal, seguramente che soará esta imaxe, que era a portada do último REA do curso, titulado A vida é puro teatro.

Portada dun REA de cREAgal sobre teatro con dúas máscaras clásicas de teatro

O reto que se propuña no REA A vida é puro teatro era o de representar, por grupos, cada un dos lances da obra Os vellos non deben de namorarse, de Castelao.

Durante as distintas fases do reto aprendestes a ler teatro, a adaptar a obra para podérdela representar e mesmo a deseñar todos os elementos propios dunha obra de teatro, como o vestiario ou os decorados.

Empézache a soar?

Lectura facilitada

Es unha persoa con boa memoria?

Ou esqueces as cousas moi rápido?

Lembras o que almorzaches hoxe?

Nós axudarémosche a facer memoria.

Quizais en 1º da ESO empregastes os recursos do proxecto cREAgal.

Se os usastes, soarache esta imaxe.

Estas máscaras de teatro clásico eran a portada do último REA do curso.

Ese REA titulábase A vida é puro teatro.

Nese REA propúñase representar unha obra de teatro.

A obra era Os vellos non deben de namorarse, de Castelao.

Antes de representar esa obra aprendestes varias cousas.

Primeiro aprendestes a ler teatro e despois aprendestes a montar un espectáculo teatral.

Tivestes que montalo todo vós, desde o vestiario ata os decorados!

Agora xa sabes de que che falamos?

Audio

E se non lembras...

E se non lembras nada... non te preocupes!

Levas horas facendo memoria e non lembras nada?

Quizais non lembras nada porque non empregastes os recursos educativos do proxecto cREAgal, pero non pasa nada! Ademais, sempre convén repasar un pouco antes de continuar.

En 1º da ESO apréndese o que son os xéneros literarios e o que é o xénero dramático, ao que adoitamos chamar popularmente "teatro".

Tamén se aprende o que é unha peza teatral, como se le un texto dramático e como se pode facer para levar á escena ese texto, o que coñecemos como representar unha obra de teatro.

Queres que o repasemos?

Lectura facilitada

Levas horas facendo memoria?

Aínda non lembras nada?

Pode ser que non empregásedes os recursos do proxecto cREAgal. Non pasa nada!

En 1º da ESO apréndese o que son os xéneros literarios, como a narrativa, a poesia e o teatro.

O teatro chámase literatura dramática. Son dúas formas de dicir o mesmo.

En 1º da ESO tamén se aprende a ler teatro e como se fai para representar unha obra de teatro.

Queres aprender máis sobre teatro?