1. Problema de partida: rehabilitación

Buscade unha vivenda pública ou candidata a ser mercada con cartos públicos, que estea en estado de abandono. Queremos adaptala para un fin social/ambiental/cultural que vós mesmas decidiredes. Ides presentarvos ás axudas do plan PIREP: Programa de impulso á rehabilitación de edificios públicos.

Con estas axudas, a administración pública quere dar exemplo do camiño cara á descarbonización do sector construtivo, renovando, antes de 2050, o parque público autonómico para convertelo en edificios de alta eficiencia enerxética, esteticamente coidados e inclusivos, cun aforro mínimo do 30 % de enerxía primaria non renovable en cada actuación.

Que vos van financiar, e polo tanto en que debedes fixarvos?

Imos facer un prototipo da vosa proposta de rehabilitación.

2. Análise do problema

• Definide adecuadamente as necesidades e o estilo de vida de quen vai vivir na vivenda. Un bo deseño garante comodidade, confort pero tamén eficiencia enerxética.
• Debedes ter en conta aspectos como a distribución dos espazos, a elección dos materiais, a iluminación e ventilación adecuadas...
• Non ides executar a obra, pero podedes ter en conta o presuposto e a pegada ecolóxica á hora de facer a maqueta.

Sexa cal sexa o proxecto que deseñedes, debedes ter en conta todos os aspectos que vimos ó longo das unidades anteriores: orientación no espacio, tipo de terreo, clima (luz, precipitacións e ventos), sistemas de aforro pasivos e activos, uso de novas tecnoloxías, domótica e IA, sistemas de mellora de eficiencia nas instalacións de enerxía, integración na paisaxe, etc.

É esencial que definades a función do edificio, POIS A FORMA SEGUE Á FUNCIÓN. Proposta: vede este programa de Escala Humana de RTVE- Futurismos

3. Ferramentas para idear solucións innovadoras: SCAMPER e mapa de ideas

Unha solución innovadora resolve un problema de forma creativa, eficiente e viable. Na arquitectura, pode supoñer deseñar vivendas que aproveiten a luz natural, usen materiais sostibles ou se adapten a persoas con mobilidade reducida.

Emprega técnicas creativas como SCAMPER (Substituír, Combinar, Adaptar, Modificar, Poñer outros usos, Eliminar, Reordenar) ou un mapa de ideas. Axúdanche a xerar alternativas orixinais.

Un mapa de ideas funciona así:

• Tema central: colócase no centro do mapa (por exemplo: vivenda sostible).
• Ramificacións principais: parten do centro e representan ideas clave (por exemplo: materiais, enerxía, deseño...).
• Subramas: conectan ideas secundarias relacionadas coas principais (por exemplo: dentro de enerxía: solar, xeotérmica, biomasa).
• Palabras clave e imaxes: úsanse para visualizar os conceptos dun xeito claro.
• Forma radial: aseméllase á estrutura dunha árbore ou neurona.

4. Da idea ó prototipo: bosquexo, planos e esquemas técnicos, follas de proceso

Xa sabes como vai esto do método de proxectos! Detectamos un problema, formulamos unha idea, facemos un bosquexo, deseñamos o prototipo e construímolo.  Nos capítulos seguintes imos ver softwares para deseñar a túa vivenda e un exemplo de maqueta. Pero antes hai que ter un bosquexo:

• Sintetiza os criterios básicos que debe cumprir a túa construción e introdúceos como "prompts" nun programa de deseño de imaxes de IA para ver que propostas che fai.
• Debuxa a lapis varios deseños antes de escoller un. Pensa nas dimensións e materiais que terá a túa construción.

5. Comunicación da solución e avaliación do resultado

Deso vai a ODE 5, que chamamos Menos é máis. Pero antes de chegar alí, revisa a rúbrica do teu deseño, así aseguraraste de cumplir obxectivos!