Entrando xa na provincia de A Coruña e algo cansos, pero moi felices pola aventura, chegamos a Melide, un municipio moi interesante monumentalmente. Percorrendo as súas rúas podemos atopar capelas, igrexas, cruceiros, pontes … que non podemos deixar de visitar. Podedes ver un pouquiño do que nós vimos, premendo no bocadillo que aparece enriba de Melide.

Esta vila é a capital da comarca Terra de Melide, integrada polos concellos de Melide, Santiso, Toques e Sobrado. Xunto cos demais municipios da comarca é un importante centro de actividade agropecuaria centrado na gandería do vacún de leite e carne e de gando porcino. O sector forestal cada vez ten máis peso. Outra actividade importante en Melide é o comercio e a hostalería na que os peregrinos e peregrinas coma nós xogamos un papel importantísimo.

Xa estábamos abraiados con toda esta información, cando Mauro viu o indicador da Área recreativa do río Furelos. Tanto lle gusta a natureza que aló nos fomos todos a ver cos nosos propios ollos toda a beleza do lugar, no que a flora e fauna de Galicia están presentes.

FERVENZA DAS BRAÑAS Un pouco máis arriba da área recreativa está a Fervenza das Brañas, cunha altura duns 30 metros. Xa acostumados a camiñar decidimos subir ata ela, comezando o paseo desde a zona recreativa, despois de descansar un pouco e por suposto desfrutar da natureza. Nós sacamos a nosa libretiña e comezamos a anotar todos os animais e plantas que atopamos. Propoñémosvos completar con nós unha ficha de cada un deles.