O ano 2007 foi o ano do centenario de As señoritas de Avignon. Trátase dun aniversario moi especial xa que con este cadro naceu o CUBISMO, que é case o mesmo que dicir que naceu de novo a Pintura. Dende o Departamento de Artes Plásticas do I.E.S. A Cachada de Boiro quixemos celebrar este acontecemento a través dun proxecto ambicioso. Os alumnos de 3º E.S.O. acometeron a reprodución en gran formato dunha selección de obras cubistas. Sen dúbida esta actividade resultou de gran interese na aula; a través dela os alumnos deberon traballar en equipo e puideron estudar as formas, as cores, os temas e as técnicas empregadas por artistas tan importantes como Picasso, Juan Gris, Braque… Artistas todos eles que viviron e traballaron en París durante a voráxine das Vangardas e cuxas innovacións revolucionaron a pintura deixando atrás conceptos que rexían a arte dende o Renacemento. Unha revolución que dura ata os nosos días e é que as señoritas, a pesares do seu século de vida, seguen tan frescas!

As pinturas, realizadas en diversas técnicas sobre lenzo, forman unha exposición que agora poñemos a disposición doutros centros de Galicia que a soliciten. Ademáis, nesta web pódese atopar información sobre este movemento artístico, coñecer aos seus principais representantes, estudar as súas obras, xogar e acceder a unha serie de actividades propostas para desenvolver na aula.

Toda a información sobre a exposición, as súas características e as condicións para solicitala está na ligazón: Solicitar exposición