A nosa 'Cooperation League'

A nosa Cooperation League é un REA (Recurso Educativo Aberto) para a área de Educación Física que ten como finalidade traballar as capacidades físicas básicas, a través do atletismo; e os valores do deporte, a través da organización dentro da clase de E.F. dunha liga cooperativa de balonmán e floorball, na que se valorará máis o traballo en equipo que o resultado dos partidos.

Nesta situación de aprendizaxe proponse un reto final no que, a partir dunha noticia ficticia na que se anuncia a prohibición dos deportes no colexio debido aos conflitos que xeran, o alumnado creará, como produto final, unha nova noticia (en formato sonoro, audiovisual ou escrito) na que demostre que outro xeito de competir é posible.

A situación de aprendizaxe proposta ten como metas de aprendizaxe:

Coñecer e poñer en práctica deportes individuais, como o atletismo, e colectivos, como o balonmán e o floorball.
Descubrir unha nova forma de competir que prime a cooperación por riba do resultado numérico.
Desenvolver habilidades motrices específicas que requiran a toma de decisións técnicas e tácticas durante a práctica deportiva.
Traballar en equipo asumindo responsabilidades individuais e colectivas para acadar un obxectivo común.
Fomentar e promover condutas que favorezan a convivencia, o xogo limpo e a deportividade.
Experimentar formas de práctica deportiva que contribúan á promoción da saúde física, mental e social de xeito integral.

Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.

Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.

As situacións de aprendizaxe do proxecto cREAgal estrutúranse en cinco fases:

A primeira fase está centrada na motivación do alumnado, a identificación da temática e descrición do reto.
A segunda fase trata de activar os coñecementos previos do alumnado.
Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
Na cuarta fase, o alumnado desenvolverá o reto proposto poñendo en xogo todo o aprendido.
Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.