Este Recurso Educativo Aberto (REA) comprende a proposta de unidades 2 e 3 de PROENS para o segundo curso da ESO da materia de Xeografía e Historia. Os contidos céntranse na Idade Media europea, dende o sistema feudal ata as manifestacións artísticas dos estilos románico, gótico e hispanomusulmán.

O alumnado terá como reto investigar e divulgar o patrimonio histórico-artístico máis próximo, centrándose se é posible nos monumentos medievais da contorna. Preténdese, por tanto, que o alumnado coñeza e sexa quen de poñer en valor o patrimonio cultural material.

O obxectivo é que entre todos e todas poñan a súa pegada na preservación do patrimonio da contorna, especialmente na de aqueles monumentos ou obras do período medieval. Para conseguilo, escolleran unha serie de monumentos dos que teñan máis preto e terán que investigar a súa historia, describir o seu estilo artístico e achegar a maior cantidade de información da que sexan capaces.

Para difundir toda esa información, terán tres opcións:

• Elaborar infografías dos monumentos
• Crear códigos QR e instalalos nos monumentos
• Facer unha planificación de itinerario de visitas

Este REA está especialmente vencellado aos ODS da Axenda 2030 números 4. Educación de calidade, 5. Igualdade de xénero e 16. Paz, xustiza e institucións sólidas.