Eixes da proposta didáctica
A área de Ciencias da Natureza busca formar nenas e nenos como persoas activas, responsables e respectuosas co medio natural. A través da observación sistemática, a medición, a experimentación e a formulación de hipóteses, aprenden a comprender a ciencia como un proceso de investigación, respondendo aos problemas dunha sociedade globalizada e en constante desenvolvemento científico-tecnolóxico.
O alumnado debe adquirir conceptos, destrezas e actitudes relacionadas cos seres vivos, a materia, as forzas e as formas de enerxía, así como o funcionamento do corpo humano. Isto axuda a abordar a importancia do coidado da saúde, o benestar emocional, o respecto cara aos seres vivos e a súa contorna, promovendo os obxectivos de desenvolvemento sustentable.
A dixitalización das contornas de aprendizaxe require un uso seguro e responsable da tecnoloxía, xunto coa promoción do espírito emprendedor e o desenvolvemento das destrezas tecnolóxicas. Isto facilita a realización de proxectos interdisciplinares cooperativos que achegan solucións creativas e innovadoras a través do desenvolvemento de prototipos con valor ecosocial, fomentando a aprendizaxe activa e contextualizada.
Este REA contribúe a varios dos obxectivos da área, principalmente ao obxectivo 2, coñecer e tomar conciencia do propio corpo para desenvolver hábitos saudables e para conseguir un alto grado de benestar; o obxectivo 5, utilizar recursos dixitais de forma segura, responsable e eficiente, traballando de maneira individual e en equipo, e para reelaborar e crear contido de forma creativa e manipulativa; e o obxectivo 6, resolver problemas a través de proxectos de deseño e da aplicación do pensamento computacional para xerar cooperativamente un produto creativo e innovador.
Para abordar con posibilidades de éxito as numerosas situacións ás que se verá exposto o alumnado ao longo da súa vida, será preciso desenvolver, de maneira integral, capacidades de carácter cognitivo e motor, pero tamén afectivo-motivacional, de relacións interpersoais e de inserción social. E todo isto, buscando solucións creativas e aplicándoas a problemas da realidade.
Esta situación de aprendizaxe busca promover valores e accións que favorecen un futuro máis xusto, igualitario e respectuoso co planeta. Está directamente conectada cos seguintes Obxectivos de Desenvolvemento Sustentable (ODS):
- ODS 3 - Saúde e benestar: xa que fomenta a educación sobre a saúde sexual e reprodutiva, incluíndo os seus coidados e a prevención de enfermidades. Tamén contribúe a mellorar o benestar físico, emocional e social dos estudantes.
- ODS 4 - Educación de calidade: o enfoque pedagóxico do REA asegura que os alumnos teñan acceso a unha formación científica rigorosa sobre a reprodución, promovendo a aprendizaxe crítica e a desmitificación de falsas crenzas.
- ODS 5 - Igualdade de xénero: ao abordar temas como os cambios físicos, sociais e emocionais, e ao dar visibilidade á menstruación e á saúde sexual desde unha perspectiva igualitaria, este material axuda a combater estereotipos de xénero e a promover a equidade.