Que non che conten contos
Que non che conten contos! é un REA (Recurso Educativo Aberto) para a área de Ciencias Naturais que ten como finalidade traballar a función de reprodución. Partirá da imaxe que temos dos demais e da nosa propia, desmontaremos mitos sobre a educación sexual, traballaremos a anatomía e a fisioloxía destes aparellos, e remataremos con indicacións e consellos para coidar a saúde sexual.
Esta situación de aprendizaxe correspóndese coa unidade didáctica 4 da programación modelo de PROENS.
Grazas a esta situación de aprendizaxe o alumnado aprenderá a coñecer máis sobre a función de reprodución. Dende os órganos que forman cada aparello ata os coidados propios e as enfermidades máis comúns, pasando polas fases da xestación (fecundación, embarazo e parto) e tamén que é o período ou menstruación.
Afondarán no coñecemento do seu propio corpo, dos aparellos e órganos reprodutores e das súas funcións. Buscarán información dos mesmos e realizarán diferentes tarefas de cada un deles para explicalos como parte do reto final.
En resumo, ao final deste REA, realizarán un reto no que afrontarán o traballo do aparello reprodutor dende unha perspectiva teórica e tamén manipulativa, pois aplicarán os coñecementos aprendidos para crear diferentes materiais, desde maquetas ou folletos ata un conto enrolable.
O REA "Que non che conten contos!" ten como metas de aprendizaxe:
- Coñecer os órganos e aparellos reprodutores feminino e masculino.
- Profundar no coñecemento da menstruación, as súas fases, como afecta ao corpo das mulleres e aplicacións para levar un control da mesma.
- Descubrir máis sobre a xestación e as súas fases: fecundación, embarazo e parto.
- Afondar nos cambios propios desta idade, tanto físicos, como sociais e emocionais, ademais de coidados e enfermidades propias relacionadas con estes.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.
As situacións de aprendizaxe do proxecto cREAgal estrutúranse en cinco fases:
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.