Personals trainers
"ExpoMoving" é un REA (Recurso Educativo Aberto) coa fin de concienciar ao alumnado, e tamén ao entorno próximo do mesmo, da importancia de levar unha vida activa e saudable. Nesta situación de aprendizaxe o alumnado terá que traballar en grupo para crear unha xornada saudable coas súas familias. Entre todos os grupos prepararán actividades ou tarefas nas que se traballen as capacidades físicas básicas e os hábitos saudables, sendo pensadas para realizar polos seus familiares.
Durante o proceso de resolución do reto que se propón no REA, o alumnado aprenderá a dar valor ás accións que fan día tras día e que lle serven para coidar a saúde. Aprenderan cousas que poden facer para ter unha mellor condición física e uns bos hábitos saudables. Faremos unha aproximación ás condicións físicas básicas, como son a flexibilidade, a forza, a velocidade e a resistencia.
O REA "ExpoMoving" ten como obxectivos principais:
1. Identificar alimentos naturais e saudables, diferenciándoos dos procesados e ultraprocesados, para promover unha alimentación saudable.
2. Coñecer e realizar probas ou test de valoración da condición física saudable, relacionándoas coas diferentes capacidades físicas.
3. Deseñar e poñer en práctica actividades para o desenvolvemento das diferentes capacidades físicas relacionadas coa saúde, tendo en conta as características doutras persoas.
4. Aprender a colaborar para crear e promocionar iniciativas que promovan un estilo de vida saudable.
5. Recoñecer a importancia de manterse activo fisicamente e reflexionar sobre como mellorar os propios hábitos diarios.
6. Adquirir hábitos de vida saudables, promovendo a práctica dunha actividade física regular, e convertelos en algo perdurable ao longo de toda a vida.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.
As situacións de aprendizaxe do proxecto cREAgal estrutúranse en cinco fases:
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.