Recursos materiais necesarios

O REA está deseñado para permitir ao profesorado adaptar as propostas de traballo para o alumnado aos recursos dispoñibles.

Para a presentación do REA e as tarefas individuais e de grupo das fases 2 e 3: un equipo informático.

Para as actividades motrices e para todo o que ten que ver co deseño do evento, non se determina o procedemento de elaboración. Recomendacións segundo os tres tipos de recursos:

• Sen medios dixitais: uso de material específico de Educación Física.
• Con aplicacións sen conexión a Internet: uso de LibreOffice Draw para a elaboración dos carteis. Hai que ter en conta que este tipo de aplicacións non permite o traballo compartido sobre o mesmo produto.
• Co uso de servizos en Internet: utilización de plataformas como a aulavirtual ou Polotno como soporte para o traballo colaborativo de creación de cartelería ou outras creacións.

Proposta de agrupamentos para actividades grupais

A primeira proposta de tarefa de grupo do REA vai dirixida a todo o grupo-clase, co dobre obxectivo de motivar e activar os coñecementos previos do alumnado

Na fase 2 organízanse grupos heteroxéneos para descubrir o que o alumnado sabe sobre habilidades ximnásticas, sobre os diferentes tipos de bailes e sobre a cultura galega, algo que lles servirá para superar o reto. Recoméndase que eses grupos traballen xuntos ao longo de todo o REA.

No REA non se fai mención ao número de alumnas e alumnos que integran cada grupo pois dependerá da totalidade do alumnado. De ser posible, o número debería estar en torno a 6, aínda que iso supoña a redución de grupos.

Produtos finais

O REA consiste en organizar un concurso de habilidades motrices e artístico expresivas que reforcen a autoestima, a desinhibición e o traballo en equipo. A maiores, deberán participar no mesmo e presentar ante o público do instituto unha actuación.

Dentro da organización do evento, tamén terán outros retos:

• Difusión do evento.
• Organización do material.
• Xestión da luz e do son.
• Formación do xurado.

Enfoque multinivel do reto

Tanto os retos como as tarefas individuais preséntanse multiniveladas, con varias opcións identificadas. O alumnado pode escoller segundo o seu criterio calquera das actividades individuais, no diario de aprendizaxe existen apartados específicos para que a alumna e o alumno expliquen, se así o consideran, os motivos da elección.

O reto de organizar unha proposta de evento preséntase coa liberdade de que o alumnado poda escoller como vai ser o evento de habilidades e á vez, escoller o tipo de espectáculo que vai presentar diante do público. Para iso deberán ter en conta toda a información obtida ao longo das distintas fases do REA. Gustaralles máis o baile da cultura galega ou bailes máis habilidosos como o break dance? Tamén poderán verse seguros coa práctica de habilidades ximnásticas. Ou preferirán os xogos populares?

O profesorado pode orientar e recomendar actividades.

Diario de aprendizaxe

O diario de aprendizaxe ofrécese como unha proposta de guía de reflexión (non avaliable) para o propio alumnado. Busca que recapaciten sobre as súas aprendizaxes e a maneira na que eles aprenden (estreitamente ligado ca competencia aprender a aprender). Pero é tamén para o profesorado, xa que, aínda que non sexa unha actividade avaliable, a revisión dos diarios de aprendizaxe pode servir para guiar e reorientar a nosa práctica docente e adaptarse mellor ás características do noso alumado.

No diario, respóndense cuestións relativas ás aprendizaxes adquiridas e ao proceso e valoración das mesmas. O alumnado ao rematar cada unha das fases ten unha "chamada" ao diario. Debido ao carácter especial da nosa área o diario está pensado para poder utilizalo de diversas maneiras, (tanto de maneira dixital como a man e de maneira completa ou segmentada por fases) como o docente decida:

• Opción A: o diario pódese imprimir en formato "libriño" en A5, un tamaño razoable e funcional se decidimos que os nosos alumnos e alumnas o leven ao pavillón ou ximnasio (espazo de xogo) e poidan cubrir nun momento da sesión a fase que se considere.
• Opción B: o diario pódese imprimir por fases e ser entregado segmentado como se fose unha ficha a realizar ao finalizar cada fase.
• Opción C: o diario pódese realizar e editar directamente no ordenador, coma unha tarefa á realizar na casa ou no seu tempo libre e posteriormente ser entregado ao rematar cada fase (se é segmentado) ou ao finalizar á situación de aprendizaxe (arquivo enteiro).

Búscase ter o maior tempo motriz polo que, aínda que a reflexión e análise sexan parte da aprendizaxe, débese pensar a mellor maneira de utilizalo en base as características do noso alumnado, a tipoloxía, infraestrutura e características do noso centro e material tecnolóxico dispoñible (no centro e fogares do alumnado).

Sesións de Educación Física de compromiso motor

As sesións de EF con compromiso motor estarán centradas na práctica dos contidos.

Hai que ter en conta que o REA está deseñado seguindo a programación modelo de Proens, polo que a temporalización debe axustarse á programación de aula. Tamén se deberá manter un equilibrio entre as sesións de aula e as motrices. Non podemos esquecer que a área de Educación Física ten un gran compoñente motor.

A planificación das sesións que se describen no apartado "2.2. Temporalización" debe entenderse como unha proposta de organización que logo o docente deberá concretar segundo as características do alumnado, recursos e instalacións dispoñibles.

Modelos de sesión para a elaboración de sesións desta situación de aprendizaxe:

Acceso ao documento en PDF.

Acceso ao documento en formato editable.

Tratamento da diversidade

O REA do alumnado ten as opcións de lectura facilitada, audio e apoio visual como complemento para todo aquel alumnado que necesite máis opcións de comprensión que a principal que se ofrece. A maiores, debemos recordar que as sesións motrices tamén deben ter en conta o deseño DUA, polo que se recomenda elaborar as sesións tendo en conta as características do voso grupo clase.