Esta proposta didáctica céntrase no coñecemento das palabras e na importancia das linguas para conectar comunidades. O alumnado terá que ir acadando diferentes aprendizaxes e habilidades comunicativas seguindo unha ruta marcada que culminará coa creación dunha instalación artística significativa para o grupo clase. Este percorrido pola situación de aprendizaxe irá encamiñado á consecución das competencias clave por parte do alumnado.

Análise de situacións comunicativas, no que o alumnado terá que:

• Identificar os elementos da comunicación en situacións cotiás.
• Valorar e potenciar os aspectos que melloran a comunicación.
• Coñecer diferentes códigos e reflexionar sobre a necesidade de utilizar o código que mellor se adecúe a cada situación, tendo en conta factores ambientais, distintas capacidades das persoas, etc.

Produción de textos orais, como a dramatización, no que o alumnado terá que:

• Transmitir a mensaxe a través da linguaxe oral e xestual.
• Practicar a entoación, dicción e fluidez.
• Traballar en equipo, chegando a acordos e respectando os roles.

Comprensión de textos orais, no que o alumnado terá que:

• Extraer información relevante.
• Destacar as palabras clave.
• Resumir a información.

Produción de textos escritos, no que o alumnado terá que:

• Organizar instrucións de xeito eficaz.
• Utilizar os signos de puntuación necesarios.
• Escribir con corrección ortográfica, utilizando correctamente o acento agudo e as maiúsculas.

Comprensión de textos escritos, no que o alumnado terá que:

• Seguir as instrucións dun xogo.
• Traballar de xeito autónomo cando as actividades o requiran seguindo as instrucións dos enunciados.

Participación activa nas titorías (asembleas) no que o alumnado poderá:

• Practicar a escoita activa.
• Participar libremente con intervencións axeitadas, nun entorno seguro.
• Respectar a quenda de intervencións.
• Respectar as intervencións dos demais sen emitir xuízos.

Contribución á consecución dos obxectivos de desenvolvemento sostible (ODS):

• ODS 10, redución das desigualdades. O fío condutor deste REA contribúe á cohesión do grupo a través de distintas actividades que buscan empoderar a cada persoa, permitíndolle participar activamente sen temor a sufrir discriminación dentro do grupo clase. Trátase de crear rede, un tapiz de igualdade no que as diferenzas de xénero, orientación sexual, discapacidade, procedencia, orixe, cultura ou relixión sexan aceptadas e respectadas.
• ODS 16, promover sociedades xustas, pacíficas e inclusivas. Aprender a importancia de que haxa leis xustas para toda a sociedade e o dereito a ser tratados xustamente nos tribunais (é dicir, sen discriminación por razón de xénero, orientación sexual, discapacidade, procedencia, orixe, cultura ou relixión). Neste REA, a través do xogo, temos a oportunidade de experimentar que cando xogamos e respectamos as regras, o xogo é divertido e xusto para todas as persoas.

Tamén ten importancia neste REA a creación dun espazo seguro, no que sentirnos protexidos e poder expresarnos con confianza.

O dereito á información, que debe ser accesible para todas as persoas a través do uso das diferentes linguas e códigos que faciliten a comunicación.

En resumo: participando activamente e aprendendo a cooperar e colaborar para resolver problemas; aceptando a diversidade, valorando as habilidades e talentos de cada persoa; respectando as normas e practicando a escoita activa, este REA contribúe á formación dunha cidadanía máis xusta.

Este REA, "Acariciando palabras", realizouse a partir da programación modelo de PROENS para a área de Lingua Castelá e Literatura de 6º de Educación Primaria, máis concretamente a partir da Unidade Didáctica 1: "Por fin somos os maiores!". Trátase da primeira unidade deste curso e referénciase nos seguintes bloques:

• O bloque 1. A lingua e os seus falantes. Procura, a través dos criterios de avaliación e contidos deseñados, familiarizar ao alumnado coa diversidade cultural e lingüística da súa contorna, favorecendo a reflexión interlingüística, a identificación e o recoñecemento e rexeitamento dos prexuízos lingüísticos e a valoración da diversidade cultural. O uso dunha linguaxe, verbal e non verbal, non discriminatoria, respectuosa coas diferenzas e coa perspectiva de xénero constitúe outro dos núcleos importantes de aprendizaxe.
• O bloque 2. Comunicación oral. Recolle aspectos fundamentais da lingua oral. O uso oral da lingua ten o propósito de favorecer a adquisición de destrezas específicas de pronuncia e entoación axeitadas; de estratexias de recoñecemento, selección e interpretación da información; da construción e comunicación do coñecemento mediante a planificación e produción de textos orais e multimodais; da identificación e modelización das propiedades e tipoloxías dos textos; da interacción oral en situacións de aula, e de escoita activa na resolución dialogada de conflitos, respectando as normas esenciais da cortesía lingüística. A lectura e a produción oral implican unha paulatina mellora na comprensión de textos e inciden na aprendizaxe da lingua.
• O bloque 3. A Comunicación escrita. Inclúe aspectos básicos e indispensables da lingua escrita, intensificando gradualmente o uso persoal, autónomo e creativo da lingua escrita. Implica o coñecemento das posibilidades que ofrece o código desde a perspectiva do léxico, da ortografía, da estrutura do discurso e das dimensións ética e estética. A produción de textos escritos e multimodais suporá a procura do xénero discursivo e do tipo de texto adecuado para cada situación comunicativa, utilizando, tanto de forma individual como colectiva, estratexias de planificación, redacción, revisión e edición. Nesta etapa teñen que consolidarse o dominio de técnicas gráficas, a relación entre son e grafía, as normas ortográficas convencionais e a disposición do texto desde as diferentes fases do proceso evolutivo da escritura. A lectura, tanto de forma individual como compartida, e a comprensión lectora permitiranlle ao alumnado adquirir as destrezas necesarias para a identificación das ideas máis relevantes e do sentido global dos textos, para a realización de inferencias e para a detección dos usos discriminatorios da linguaxe.
• O bloque 6. Reflexións sobre a lingua e os seus usos no marco de propostas a produción e comprensión de textos orais, escritos ou multimodais. Incorpora criterios de avaliación e contidos relacionados co coñecemento da lingua e a súa organización, facilitando a construción guiada de conclusións propias sobre o sistema lingüístico e a mellora dos textos propios. Supón para o alumnado o establecemento de xeneralizacións básicas respecto do funcionamento da lingua, prestando especial atención ás diferentes relacións de forma, función, concordancia e significado entre as palabras e grupos de palabras; á observación e comprensión das regras de acentuación; ás modalidades oracionais en relación coa intención comunicativa; á correlación temporal establecida polos tempos verbais e ao uso de dicionarios, en distintos soportes. Preténdese, así mesmo, facilitarlle e permitirlle ao alumnado o coñecemento e a reflexión sobre a situación das linguas da contorna e do seu ámbito escolar dentro dun contexto plurilingüe, e a identificación de similitudes e diferenzas entre estas para acadar unha competencia comunicativa integrada.

No que respecta aos obxectivos, este recurso céntrase nos seguintes:

Os descritores das competencias clave incluídos nesta unidade son os seguintes: