Este REA (Recurso Educativo Aberto) foi deseñado para que o alumnado adquira contidos sobre os seres vivos mediante a creación de xogos de mesa. A través desta metodoloxía, os nenos e nenas traballarán a materia dun xeito activo, xa que deberán investigar sobre os seres vivos e aprender a elaborar fichas técnicas. Así mesmo, potenciarase a competencia lingüística ao ter que presentar os seus proxectos e explicar as dinámicas de xogo ante compañeiros e compañeiras doutras clases.

O recurso propón un percorrido pola estrutura e as funcións básicas dos seres vivos, así como polas características que permiten clasificar a biodiversidade do planeta. A secuencia didáctica fundamenta a aprendizaxe sobre eixes clave: a célula e os niveis de organización, as funcións vitais e os aparellos implicados, os criterios de clasificación nos cinco reinos e o concepto de biosfera, incluíndo o uso do microscopio.

Ademais dos contidos científicos, o alumnado explorará a utilidade e creación de fichas técnicas, así como a tipoloxía e materiais necesarios para os xogos de mesa. Dada a relevancia da competencia lingüística nestas idades, o proxecto pon especial énfase na expresión escrita (coa redacción das tarxetas e instrucións) e na comunicación oral, que se traballará durante a sesión de presentación dos xogos.

Metas de aprendizaxe:

1. Coñecer a estrutura, as funcións vitais e a clasificación dos seres vivos.
2. Recoller datos dunha investigación, organizar a información e formular conclusións.
3. Seleccionar e utilizar información relevante de maneira crítica.
4. Ser quen de deseñar, construír e compartir xogos de mesa coa temática dos seres vivos.
5. Mellorar a expresión oral e as habilidades de presentación en público.
6. Saber organizar, avaliar e reflexionar sobre os resultados dunha exposición sobre os xogos de mesa creados.