Recursos materiais necesarios

Ordenadores con conexión a Internet, material básico de debuxo (lapis, goma, tesoiras, papel, cartolina, pinturas de calquera tipo, e outros), papel de calco (ou papel de forno), rotulador de tinta negra ou pincel e témpera tamén negra), papel continuo, cámara fotográfica, camiseta, papel tránsfer (opcional), impresora (opcional), ferro, papel encerado (de forno), plástico para envolver alimentos (opcional), cartóns, pegamento, caixas de cartón. 

Programas informáticos: editores de vídeo (OpenShot ou outro a elixir), editores de música e voz (Audacity ou outro a elixir), deseño (LibreoOffice Draw ou outro de características similares).

Proposta de agrupamentos para actividades grupais

A primeira proposta de tarefa de grupo do REA vai dirixida a todo o grupo-clase, co dobre obxectivo de motivar e activar os coñecementos previos do alumnado.

Ao longo do REA fanse propostas de tarefas para o traballo colaborativo en equipo. A análise, valoración e avaliación das producións dos grupos faise tamén en grupo.

Produtos finais

Durante as distintas fases irán elaborando diferentes obras plásticas, empregando o estilo Arte pop, coas que completarán, xunto cun pequeno traballo de investigación, un sinxelo documental sobre Andy Warhol que presentarán ao resto do centro.

Tamén empregarán as súas obras para decorar os corredores en diferentes conmemoracións.

Enfoque multinivel do reto

Tanto o reto como as tarefas individuais preséntanse multiniveladas.

Actividades individuais.

No apartado correspondente ás tarefas individuais ("2.2. Agora ti" e "3.4. Antes de rematar") recóllense varias actividades con diferentes características, procedemento de resolución, tipoloxía e nivel de dificultade, coa intención de que o alumnado poida escoller segundo o seu criterio calquera das actividades propostas. Será a persoa docente a que decida, se así o estima, o número de tarefas que debe resolver o alumnado.

No diario de aprendizaxe existen apartados específicos para que a alumna e o alumno comente as actividades que realizou en cada fase.

Reto.

Para resolver o reto, o alumnado debe ir elaborando produtos que, recompilados, formarán parte da exposición final e do documental en formato audiovisual que deben crear as alumnas e alumnos de xeito cooperativo.

Na planificación das creacións do alumnado tivéronse en conta factores como as características do material, a seguridade e a dificultade de elaboración. Os elementos necesarios para crear as obras artísticas son recursos de uso habitual para o alumnado. No caso de utilizar algún material non común, por exemplo o soporte tránsfer para o estampado, ofrécese unha alternativa con elementos habituais e sinxelos de obter.

Para o reto final cítanse dúas aplicacións informáticas de tratamento do vídeo e son (OpenShot e Audacity), que se recomendan por ser libres, gratuítas e estar dispoñibles para diferentes sistemas operativos. Esta proposta vai acompañada do correspondente videotitorial de uso, adaptado á idade do alumnado e ás características do reto. A persoa docente pode tomar a decisión de usar estas ou outras aplicacións informáticas, así como plataformas online segundo os seus propios criterios.

Ofrecer un itinerario para acadar o reto que supoña non utilizar medios dixitais non é posible porque así está recollido na programación modelo de referencia para o deseño desta situación de aprendizaxe. Os centros docentes que non conten cos recursos necesarios, como equipamento informático e de gravación, poden solicitar estes recursos ao CAFI ou CFR que corresponda.

No deseño do reto tívose en conta tamén a normativa de protección de datos persoais, polo que non se solicita ao alumnado que preste a súa imaxe ou a súa voz para elaborar o documental.

Durante o desenvolvemento do REA ofrécense propostas de traballo con diferentes niveis de esixencia cognitiva.

O profesorado pode orientar e recomendar actividades.

Diario de aprendizaxe

O diario de aprendizaxe ofrécese como unha proposta de guía de reflexión (non avaliable) para o propio alumnado. Busca que recapaciten sobre as súas aprendizaxes e a maneira na que eles aprenden (estreitamente ligado ca competencia aprender a aprender). Pero é tamén para o profesorado xa que aínda que non sexa unha actividade avaliable, a revisión dos diarios de aprendizaxe pode servir para guiar e reorientar a nosa práctica docente e adaptarse mellor ás características do noso alumado.

No mesmo se responden cuestións relativas ás aprendizaxes adquiridas e ao proceso e valoración das mesmas. O alumnado ao rematar cada unha das fases ten unha "chamada" ao diario.

O diario está pensado para poder utilizalo de diversas maneiras, (tanto de maneira dixital como a man e de maneira completa ou segmentada por fases) como o docente decida:

• O diario pódese imprimir en formato "libro" en A5, un tamaño razoable e funcional, co fin de que poidan cubrir nun momento da sesión a fase que se considere.
• O diario pódese imprimir por fases e ser entregado segmentado como se fose unha ficha a realizar ao finalizar cada fase.
• O diario pódese completar e editar directamente no ordenador, coma unha tarefa a desenvolver na casa ou no tempo libre e posteriormente ser entregado ao rematar cada fase (se é segmentado) ou ao finalizar á situación de aprendizaxe (arquivo enteiro).