Motivación para abordaxe do REA

Nesta situación de aprendizaxe trabállase nos distintos tipos de vivendas e as súas características (prezo, número de habitacións, número de niveism etc.), ao tempo que se afonda nalgúns elementos matemáticos relacionados, como son os números naturais e enteiros.

É recomendable motivar ao alumnado facendo fincapé na necesidade de axudar a un membro da familia a atopar unha vivenda (fío conductor do REA). Para iso, cómpre poñer en valor o seu papel como axente inmobiliario que ofrecerá un produto final de enorme utilidade: os mapas cos prezos das vivendas. 

Recursos materiais necesarios

Para desenvolver as actividades do REA é necesaria a conexión á rede, xa que hai que buscar información, utilizar GeoGebra, ver vídeos, etc. Na versión de eXeLearning coa que foi creado, a 2.9, é preciso estar conectados para ver correctamente as expresións matemáticas escritas en LaTeX.

No caso do reto, ofrécese a posibilidade ao alumnado de escoller o soporte no que quere elaborar o producto final: en papel ou dixital. No caso de que opte por facelo en papel, precisarase imprimir o mapa da zona traballada e o uso de rotuladores ou lápices de cores. No caso de facelo en formato dixital, podería ser necesario un programa de debuxo para marcar as zonas de prezos. 

Respecto das iconas que preceden ós títulos, seguen as pautas DUA. As de cor azul indican actividades. Para as autocorrexibles, aínda que só cómpre introducir no REA o resultado final, recoméndase que o alumnado faga os seus propios esquemas cos datos, que anote os pasos da resolución e que indique cálculos, fontes empregadas e reflexións persoais no seu caderno (xa sexa dixital ou en papel).

As iconas de cor verde están relacionadas co reto e, as de cor rosa, con contidos e exemplos necesarios para comprender as actividades.

Nas actividades tipo "xogo" (que levan a icona dun mando de videoxogo), pódese configurar o gardado da puntuación. Tamén nalgunhas feitas con GeoGebra. Actualmente, en eXeLearning só se pode gardar a puntuación dunha actividade por páxina, en combinación con Moodle e formato SCORM.

Actividades grupais

Ideas para o profesorado sobre a formación de grupos:

1. Deben ser de 3 ou 4 persoas (poderíase alterar este número segundo o aspecto que se queira reforzar en actitude, pero sempre é mellor grupos pequenos).
2. É preferible que sexan heteroxéneos, aínda que puntualmente para algunha actividade se fagan grupos homoxéneos.
3. Os grupos deben ter interdependencia positiva e debe existir unha responsabilidade individual e grupal.

Roles

Neste REA inclúese un modelo para entregar ao alumnado que contén as tarefas que corresponden aos tres roles propostos:

• Xefe/a de oficina: dirixe e organiza as tarefas de forma consensuada, asegurándose de que todas as persoas as entenderon. Media nos conflitos que poidan xurdir dentro do equipo.
• Axentes de información: organiza o material e os recursos necesarios. Fomenta a participación de todas as persoas do equipo. Se o equipo está formado por 4 persoas, pode haber varios axentes de información. 
• Portavoz: comunícase con outros equipos e co/a docente. Expón os resultados e as conclusións do equipo.

Estes roles deberán acompañarse das normas habituais da aula, para manter a orde e garantir un bo desenvolvemento das actividades.

Actividades individuais multinivel

O REA, nas fases 2 e 3, inclúe actividades individuais multinivel.

Preséntanse con botóns de opcións, a elixir unha, e non ordenadas por dificultade.

O obxectivo destas actividades é desenvolver un procedemento, contido ou habilidade, ofrecendo distintas versións, que varían en dificultade ou formato, permitindo ao alumnado escoller a opción que mellor se adapte ás súas necesidades e ao seu ritmo de aprendizaxe.

Produto final

O produto final consiste na elaboración, por parte do alumnado, de dous mapas de prezos de vivendas dunha zona.

Logo de facer unha exposición dos mapas, cómpre valorar o traballo doutros compañeiros para elixir o mellor produto final.

Enfoque multinivel do reto

O alumnado poderá escoller o soporte para a realización dos mapas (en papel ou dixital).

Ademais, o alumnado terá a posibilidade incluir, nos seus mapas, máis vivendas das mínimas requiridas (xa que non se establece un número máximo).