Recursos materiais necesarios

Recomendamos a previa selección das novas e webs específicas filtrando aquela información o máis real posible. Os textos literarios que se proporcionen deberán respectar a licenzas de autoría e así facerllo saber ao alumnado.

O alumnado pode empregar material impreso e tamén a computadora persoal se fora necesario. A persoa docente decidirá o que sexa necesario en cada momento.

No caso de empregar material impreso, será necesaria unha impresora (pode ser propia do centro), tesoiras, lapis, bolígrafo e goma. 

Proposta de agrupamentos para actividades grupais

Neste REA propóñense actividades individuais e grupais, considerando as seguintes premisas:

• É recomendable a creación de grupos de 3-5 alumnos/as, de xeito que elixan ou sexan asignados polo profesorado cada un dos retos propostos. Logo, terán que expoñer o seu resultado ao resto de compañeiras/os.
• O groso do traballo será realizado en actividades grupais onde se pretende que o alumnado traballe de forma cooperativa e colaborativa. Con isto, procuramos que aprendan a coordinarse na realización de tarefas e aumenten a súa autonomía persoal. Debemos procurar que os grupos sexan diversos e heteroxéneos, na procura do traballo en equipo, para que o alumnado aprenda a tomar decisións e accións conxuntamente, promovendo a “democracia de grupo”. Para iso, recoméndase ao profesorado que implemente este REA na súa aula considerando as seguintes pautas:
  • Organiza ao teu alumnado en función das súas diferentes capacidades, para crear equipos nos que cada un pon o seu gran de área, dende os máis proactivos, líderes, organizativos aos máis pasivos, non colaborativos etc.
  • Asigna a cada alumno/a unha función no grupo na que amose as súas capacidades.
  • Crea un clima de traballo positivo e participativo, poñendo en valor os progresos e aconsellando nas dificultades.

Produtos finais

No noso REA en concreto, os produtos finais son diferentes xogos para a interacción do alumnado:

• Quen é quen. Xogo ben coñecido que se xoga por parellas que trataría sobre figuras galegas famosas en distintos ámbitos.
• Heads up. Xogo de procedencia anglosaxoa cuxa tradución aproximada ao galego sería "man a man"; trataría sobre a veciñanza da localidade de residencia, tanto da actualidade como de persoas relevantes de anos atrás pero que teñen sona na localidade.
• Memory. Xogo de relacionar cartas boca abaixo. Este estaría destinado aos usuarios da residencia da terceira idade para o que precisarán dunha entrevista en persoa ou por carta/correo. A presentación deste produto final pode ser de diversas maneiras incidindo así no concepto DUA como poderían ser: un xogo interactivo, un xogo en formato físico, o intercambio oral con apoio textual.

Enfoque multinivel do reto

Moitas das actividades desta REA están pensadas para realizarse en formato dixital, aínda que hai a posibilidade de facer moitas de xeito tradicional, en papel ou noutros formatos propostos como gravacións ou en exposición oral. O alumnado ten un diario de aprendizaxe dixital ou físico, de xeito que vai reflexionando sobre o proceso durante as distintas fases. Cumprir cos distintos retos previos posibilitará aprender ou afianzar no emprego de ferramentas de todo tipo para o deseño do reto final.

O noso reto final está destinado ao formato físico inicialmente, pero sempre podemos adaptalo para poder utilizalo e interpretalo doutros xeitos. 

Algunhas ideas serían:

Xogo "Quen é quen?": neste xogo, en vez de empregar un taboleiro, poderiamos empregar a computadora e escoller unha imaxe entre os persoeiros escollidos e traballar a descrición oralmente até adiviñar de quen se trata. Poderase virar a pantalla para confirmar que é ou non é o persoeiro descrito e adiviñado.

Xogo "Carta arriba": empregando a computadora persoal, podemos escoller unha personaxe para o noso compañeiro e, sen que a poida ver, responderlle ás preguntas que realice até que adiviñe a personaxe que lle tocou.

Xogo "Memoriza": este xogo pódese realizar dixitalmente ou incluso xogar nalgunha plataforma en liña. Para realizalo de xeito dixital pódese empregar a aplicación eXeLearning co idevice "Xogos: Cartas de memoria". A persoa docente pode axudar se este é o proceso escollido.