Eixes da proposta didáctica
A área de Educación Física fundamentase na adquisición das capacidades que contribúan ao desenvolvemento persoal e a unha mellor calidade de vida. É unha área que se dirixe ao coñecemento progresivo da conduta motora e á adquisición de actitudes, valores e normas referentes ao corpo e ao movemento.
Esta área participa tamén na consecución de diversos fins educativos na Etapa de Educación Primaria: a socialización, a autonomía, aprendizaxes básicas e mellora das posibilidades expresivas, cognitivas, comunicativas e lúdicas. A Educación Física está especialmente indicada para integrar todo tipo de alumnado e resulta idónea cara ao tratamento da diversidade na aula, fomenta a coeducación e promove a igualdade de oportunidades para ámbolos sexos.
Debemos lembrar que a Educación Física non é unha simple aprendizaxe de movementos, senón un camiño cara á educación integral e que utiliza o movemento como axente pedagóxico con diversas funcións: de coñecemento, de organización perceptiva, anatómico-funcional, estético-comunicativa, de relacións persoais, agonística, hixiénica, hedonista, de compensación e catártica.
Este REA contribúe a uns dos obxectivos principais da área: aprender a xestionar as súas emocións e as súas habilidades sociais en contextos da práctica motriz, recoñecendo diferentes manifestacións da cultura motriz, como parte relevante do patrimonio cultural, expresivo e artístico, que poden converterse en obxecto de gozo e aprendizaxe.
Para abordar con posibilidades de éxito as numerosas situacións motrices ás que se verá exposto o alumnado ao longo da súa vida, será preciso desenvolver, de maneira integral, capacidades de carácter cognitivo e motor, pero tamén afectivo-motivacional, de relacións interpersoais e de inserción social. Deste xeito, o alumnado terá que aprender a xestionar as súas emocións e as súas habilidades sociais en contextos de práctica motriz.
O REA "Exprésate na rede" se vincula directamente cos Obxectivos de Desenvolvemento Sustentable (ODS), xa que traballa aspectos como a educación de calidade, a inclusión, o benestar emocional e a aprendizaxe do uso responsable das tecnoloxías. Algúns dos ODS que se relacionan ca proposta son:
- ODS 3: Saúde e benestar → A expresión corporal e o movemento físico contribúen ao desenvolvemento físico e mental, fomentando o benestar emocional e social.
- ODS 4: Educación de calidade → Inclúe a alfabetización dixital, é dicir, aprender a usar correctamente as redes sociais nun futuro, distinguir información fiable e evitar malas prácticas en liña.
- ODS 10: Redución das desigualdades → Promove o respecto polas diferentes realidades corporais e traballa a autoestima e a confianza. Tamén intenta asegurar que todas as persoas teñan acceso a información segura e a un entorno dixital inclusivo.
- ODS 16: Paz, xustiza e institucións sólidas → A educación emocional e a resolución de conflitos mediante a expresión corporal axuda a fortalecer habilidades de convivencia e respecto. Fomenta a seguridade en Internet, a protección de datos persoais e a loita contra a desinformación e os discursos de odio.
- ODS 17: Alianzas para acadar os obxectivos → O traballo cooperativo na creación de contido multimedia na aula fomenta a cooperación e o uso responsable das redes sociais.
A través desta situación de aprendizaxe, os estudantes non só melloran a súa expresión motriz, senón que tamén adquiren habilidades sociais, emocionais e dixitais fundamentais para un mundo máis sustentable e respectuoso.