Recursos materiais necesarios

O REA está deseñado para permitir ao profesorado adaptar as propostas de traballo para o alumnado aos recursos dispoñibles.

Para a presentación do REA e as tarefas individuais e de grupo: un equipo informático.

A creación da nube de palabras e lema (apartado 2.2 o lema) pode realizarse mediante o encerado tradicional, PDI ou pantalla interactiva, sen a esixencia de equipos informáticos para o alumnado. No caso de dispor de dispositivos dixitais existen plataformas que facilitan a nube de palabras e o intercambio de información entre o alumnado (crear o lema), por exemplo https://www.wooclap.com/es/ (nova xanela), que se pode utilizar sen rexistro do alumnado, ou https://livecloud.online (nova xanela), que non esixe rexistro do profesorado nin do alumnado.

Para os carteis da exposición non se determina o procedemento de elaboración. Contémplanse tres escenarios posibles:

• Sen medios dixitais: uso de cartolina, tesoiras, pegamento e outros materiais comúns da aula.
• Con aplicacións informáticas sen conexión a Internet: uso de LibreOffice Draw para a elaboración dos carteis. Hai que ter en conta que este tipo de programas non permite o traballo compartido sobre o mesmo arquivo.
• Co uso de servizos de Internet: utilización da plataforma AbalarBox como soporte para o traballo colaborativo de creación dos produtos dixitais. AbalarBox ten un módulo que permite crear presentacións que resulta adecuado para a elaboración dos carteis. Existe tamén a posibilidade de utilizar a plataforma Agueiro.

Proposta de agrupamentos para actividades grupais

Na primeira fase créanse os equipos estables para todo o proxecto, utilízase un procedemento non dirixido, con resultados aleatorios, para o repartimento do alumnado dentro dos grupos. 

Ao longo do REA fanse propostas de tarefas para o traballo colaborativo en equipo. A análise, valoración e avaliación das producións dos grupos faise tamén en grupo.

Será necesario adaptar a configuración dos grupos (número de membros) e ampliar ou unificar temas segundo as características de cada centro educativo.

Produtos finais

O REA consiste na planificación e realización dunha campaña de concienciación sobre hábitos saudables, a campaña concretarase nunha exposición situada nun espazo definido, ou itinerante, con carteis sobre 6 temáticas. Todo o alumnado debe ter o coñecemento e competencia para expoñer o  traballo do seu equipo, e ser quen de explicar, nas visitas guiadas, os carteis dos outros grupos.

Temas:

1. Vida activa.
2. Respecto e igualdade.
3. Alimentación.
4. Coidado do corpo.
5. Seguridade.
6. Primeiros Auxilios.

Enfoque multinivel do reto

Actividades individuais:

No REA recóllense actividades individuais con diferentes características, procedemento de resolución, tipoloxía e nivel de dificultade. O alumnado pode escoller segundo o seu criterio calquera das actividades propostas, no diario de aprendizaxe existen apartados específicos para que a alumna e o alumno reflexione sobre as tarefas que desenvolveu en cada fase.

O profesorado pode orientar e recomendar actividades.

Reto:

Para a superación do reto o alumnado debe desenvolver unha campaña de promoción da saúde segundo as condicións que se definen no proxecto. Como produto principal solicítase a elaboración de carteis.

Resolución do reto con procedementos alternativos á proposta do REA:

Sen equipos informáticos: elaboración de carteis en cartolina e recompilación de elementos gráficos a partir de debuxos propios ou fotografías de material impreso (catálogos, xornais, revistas etc). 
Con equipos informáticos sen conexión a Internet: uso de programas informáticos para a elaboración do cartel, por exemplo LibreOffice Draw, cos elementos gráficos que ofrecen este tipo de aplicacións, e debuxos de elaboración propia. 

Déixase aberta a posibilidade de ampliar os produtos do reto coa creación de podcast e vídeos para a campaña.

Diario de aprendizaxe

O diario de aprendizaxe ofrécese como unha proposta de guía de reflexión (non avaliable) para o propio alumnado. Busca que recapaciten sobre as súas aprendizaxes e a maneira na que eles aprenden (estreitamente ligado ca competencia aprender a aprender). Pero é tamén para o profesorado xa que aínda que non sexa unha actividade avaliable, a revisión dos diarios de aprendizaxe pode servir para guiar e reorientar a nosa práctica docente e adaptarse mellor ás características do noso alumado.

No mesmo se responden cuestións relativas ás aprendizaxes adquiridas e ao proceso e valoración das mesmas. O alumnado ao rematar cada unha das fases ten unha "chamada" ao diario. Debido ao carácter especial da nosa área o diario está pensado para poder utilizalo de diversas maneiras, (tanto de maneira dixital como a man e de maneira completa ou segmentada por fases) como o docente decida:

• O diario pódese imprimir en formato "libro" en A5, un tamaño razoable e funcional se decidimos que os nosos alumnos e alumnas o leven ao pavillón ou ximnasio (espazo de xogo) e poidan cubrir nun momento da sesión a fase que se considere.
• O diario pódese imprimir por fases e ser entregado segmentado como se fose unha ficha a realizar ao finalizar cada fase.
• O diario pódese realizar e editar directamente no ordenador, coma unha tarefa á realizar na casa ou no seu tempo libre e posteriormente ser entregado ao rematar cada fase (se é segmentado) ou ao finalizar á situación de aprendizaxe (arquivo enteiro).

Búscase ter o maior tempo de compromiso motor polo que, aínda que a reflexión e análise sexan parte da aprendizaxe, débese pensar a mellor maneira de utilizalo en base as características do noso alumnado, a tipoloxía, infraestrutura e características do noso centro e material tecnolóxico dispoñible (no centro e fogares do alumnado).

Sesións de Educación Física de compromiso motor

As sesións de EF con compromiso motor estarán centradas na utilización do xogo tradicional popular como recurso e tamén como elemento de estudo.

No deseño do proxecto contémplase a realización dunha sesión de EF con compromiso motor por cada un dos temas que se traballan no REA, agás o de seguridade e prevención de accidentes. Esta planificación debe entenderse como unha proposta de organización que logo o docente deberá concretar segundo as características do alumnado, recursos e instalacións dispoñibles. Será a persoa docente a que tome a decisión de redefinir as sesións motrices, por este motivo no REA dirixido ao alumnado non se inclúen modelos de sesións de EF como a que se reflicte neste documento.

Modelo de sesión para esta situación de aprendizaxe:

Os alimentos ultraprocesados

Sesión de EF	Recursos
Documento en formato PDF (Nova xanela). Documento en formato de edición.	Tarxetas con alimentos, en formato PDF (nova xanela). Tarxetas con alimentos en formato de edición. Tarxetas con alimentos e números, en formato PDF (nova xanela). Tarxetas con alimentos e números, en formato de edición.

Documento modelo para o deseño das sesións de EF (ODT)

Tratamento da diversidade

Apartado	Orientacións
2.1. Un mundo de anuncios	Solicitar ao alumnado que preste atención aos modelos que aparecen na publicidade. Iniciar un debate sobre o tipo de persoa que está máis presente na publicidade. Debater sobre a forma de presentar á muller na publicidade.
2.2. O lema	Reflexionar sobre o número de palabras positivas e negativas que se recolleron na actividade.
3.5. Temas: alimentación	Solicitar ao alumnado que reflexione sobre os anuncios de alimentos. Como son os anuncios dos alimentos ultraprocesados? Nos anuncios destácanse os beneficios do alimento?
3.5. Temas: respecto e igualdade	Pedir ao alumnado que reflexione sobre o dereito á igualdade de trato e de oportunidade para tódalas persoas, independentemente das súas características físicas, procedencia, orientación sexual, e outras.
Exemplo de sesión de EF	Os modelos que se ofrecen como exemplos de sesións de EF de compromiso motor inclúen un apartado para o tratamento da diversidade no alumnado, con propostas de adaptacións e variantes.