SaudArte
SaudArte é un REA (Recurso Educativo Aberto) para a área de Educación Física que ten como finalidade concienciar o alumnado, e tamén o seu contorno próximo, da importancia de levar unha vida activa e saudable.
Durante o proceso de resolución do reto que se propón no REA, o alumnado aprenderá a dar valor ás accións que fan día tras día e que lle serven para coidar a saúde. Aprenderá cousas que poden facer para previr lesións, para evitar enfermidades, para curar ben as súas feridas, e outras aprendizaxes. Faremos unha aproximación a temáticas coma a alimentación, a postura corporal, o respecto e a igualdade, os primeiros auxilios, a educación viaria.
Metas de aprendizaxe:
- Adquirir hábitos de vida saudables, promovendo a práctica dunha actividade física regular, e convertelos en algo perdurable ao longo de toda a vida.
- Valorar os riscos nas prácticas motrices e tomar medidas de prevención.
- Adquirir coñecementos para levar a cabo unha primeira asistencia en caso de lesións e enfermidades.
- Convivir mostrando no contexto das prácticas motrices habilidades sociais, diálogo na resolución de conflitos e respecto ante a diversidade.
- Desenvolver unha campaña de promoción da saúde.
- Utilizar aplicacións e plataformas dixitais para a investigación, a creación e a comunicación, sempre desde o fomento do traballo cooperativo.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo do proxecto, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordandoos a través de metodoloxías activas.
As situacións de aprendizaxe do proxecto cREAgal estrutúranse en cinco fases.
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado coas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.