Este REA (Recurso Educativo Aberto) está deseñado para introducir ao alumnado no mundo da Estatística, que se enmarca no currículo de 1º de ESO dentro do sentido estocástico. Ademais promove o desenvolvemento de destrezas persoais e socioafectivas vinculadas ao bloque do sentido socioafectivo.

Na situación de aprendizaxe desenvolvida, o alumnado terá que analizar e interpretar os datos reais da comunidade autónoma de Galicia para coñecer o patrimonio lingüístico galego relacionado cos apelidos en cada localidade.

Deste xeito, o alumnado achegarase á realización dun estudo estatístico utilizando ferramentas tecnolóxicas para tabular datos, facer representacións gráficas e calcular os parámetros máis importantes, tras o que deberá analizará os datos recollidos e comunicar os seus resultados.

Para este fin, este REA incluirá vídeos guía para o uso do programa LibreOffice - Calc, xunto con outros xogos e retos que se proporán ao longo da situación de aprendizaxe co obxectivo de alcanzar as metas de aprendizaxe propostas na materia. 

As metas da aprendizaxe son:

1. Analizar e interpretar datos.
2. Elaborar conxeturas e tomar decisións a partir da información estatística e a súa valoración crítica.
3. Comprender e comunicar fenómenos aleatorios en situacións variadas.
4. Integrar coñecementos, destrezas e actitudes para entender e manexar as emocións.
5. Establecer e alcanzar metas de xeito individual e en grupo.
6. Aumentar a capacidade de tomar decisións responsables e informadas.