Recursos materiais necesarios

• Equipo Informático: Para o seguimento  deste REA é preciso contar cun equipo con conexión a Internet por cada dous estudantes, aínda que é recomendable ter un equipo por persoa. O software demandado é de carácter libre e está instalado nos equipos Abalar da Consellería ou vía online:
  •  Kit de construción de circuítos  eléctricos de PHET (Universidad de Colorado) Creative Commons Attribution 4.0 license (CC BY 4.0):  Versión en castelán  aloxada no  banco de recursos  cREAgal (https://www.edu.xunta.gal/centros/creagal/pluginfile.php/3009/mod_resource/content/1/circuit-construction-kit-dc_es.html), que permite construír circuítos eléctricos sinxelos.
  • Simulador de electricidade e electrónica de TINKERCAD.  Permite realizar circuítos eléctricos  mais complexos. Recoméndase a creación e  uso  dunha conta educativa para o docente e a posterior creación de contas con datos non identificativos para o alumnado do xeito que se explica no seguinte vídeo:

• Aula-taller: é moi recomendable ter dispoñible unha aula-taller, como a dotada para o departamento de tecnoloxía, para realizar a  fase de construción da maqueta.
• Materiais e ferramentas: precisarán como material principal cartón (preferiblemente de refugallo e de dúas capas), regra, lapis, pegamento, cables, latas para facer contactos,  diferentes actuadores  eléctricos e  pilas, placa solares  ou outros xeradores.

Proposta de agrupamentos para actividades grupais

Neste REA propóñense actividades individuais e grupais, considerando as seguintes premisas:

Recoméndase a creación de grupos de 3-5 alumnos/as, de xeito que elixan, ou se lles asigne polo profesorado, un dos retos propostos. Logo, terán que expoñer o seu resultado ao resto de compañeiras/os e opcionalmente (se hai tempo suficiente) xuntar os retos, de xeito que a aula estea controlada totalmente polos distintos sistemas  de control creados.
O groso do traballo realízase en  actividades grupais onde se pretende que o alumnado traballe de forma cooperativa e colaborativa. Con isto, preténdese que aprendan a coordinarse na realización de tarefas e aumenten a súa autonomía persoal. Búscase que os grupos sexan diversos e heteroxéneos, na procura do traballo en equipo, para que o alumnado aprenda a tomar decisións e accións conxuntamente, promovendo a “democracia de grupo”. Para iso, recoméndase ao profesorado que implemente este REA na súa aula considerando as seguintes pautas:

•  Organizar ó  alumnado  en función das súas diferentes capacidades, para crear equipos nos que cada un pon o seu gran de area, dende os máis proactivos, líderes, organizativos aos máis pasivos, non colaborativos, etc.
•  Asignar a cada alumno/a unha función no grupo na que amose as súas capacidades (consignar na memoria técnica).
•  Crear un clima de traballo positivo e participativo, poñendo en valor os progresos e aconsellando nas dificultades.

 Tamén existen actividades individuais (multinivel)  que procuran adaptarse a diferentes estilos ou ritmos de aprendizaxe.

Produtos finais

O produto final deste REA é o deseño e montaxe dun circuíto eléctrico que mellore un dos proxectos construídos este curso (estruturas, mecanismos, ...), de xeito que lle dean un "toque máxico".

O alumnado deberá idear, deseñar e montar un circuíto eléctrico, de diferentes niveis de dificultade,  que mellore un proxecto dos realizados este curso escolar. Algunhas ideas son: motorizar o funcionamento de mecanismos, poñer un circuíto de luces  indicativas de estados, circuítos de alumeamento  ou balización de estructuras, etc.

O circuíto deberá estar controlado cun  o mais elementos de manobra (pulsador, interruptor ou conmutador) construídos polo alumnado, e que o seus actuadores lle proporcionen unha mellora ó proxecto orixinal.

Enfoque multinivel do reto

Así establécense 4 niveis para os circuítos eléctricos propostos:

Nivel 1: Dispón  dun elemento de control “máxico” (orixinal e construído polo alumnado)  e un receptor.
Nivel 2: Dispón  de dous elementos de control “máxico” (orixinais  e construídos polo alumnado)  e un receptor.
Nivel 3: Dispón  dun elemento de control “máxico” (orixinal e construído polo alumnado) e dous  receptores independentes en paralelo, controlados con un conmutador.
Nivel 4: Dispón  dun elemento de control “máxico” (orixinal e construído polo alumnado) e dous receptores independentes en paralelo, controlados con un conmutador e un elemento innovador (peza impresa 3D ou corte láser, ...) ou unha fonte de enerxía renovable.