Un, dous, tres, RadioPatio na onda

Este é o REA (Recurso Educativo Aberto) número 6 -dun total de 6- elaborado no marco do proxecto cREAgal para a materia de Lingua Galega e Literatura de 5º de Educación Primaria.

O alumnado sitúase nun contexto real de comunicación e divulgación: detectar a falta de medios en galego dirixidos aos intereses do alumnado de 5º de Primaria. Partindo desta necesidade, a situación de aprendizaxe introduce ás alumnas e aos alumnos no mundo dos medios de comunicación, centrándose principalmente na radio como medio expresivo e informativo. Trabállanse as tipoloxías textuais propias do xénero radiofónico: guións, noticias, entrevistas, crónicas e cuñas publicitarias, sempre en lingua galega. O alumnado aprende a planificar, redactar e gravar contidos orais con claridade, entoación axeitada e estrutura coherente, desenvolvendo competencias lingüísticas, dixitais e de traballo colaborativo.

O reto principal consiste na elaboración e produción dun programa de radio escolar que faga un resumo dos principais acontecementos ou celebracións desenvolvidas no centro ao longo do curso.