Índice

1. Problema/necesidade de partida: estudo inicial.
2. Proposta de solucións e escolla da máis axeitada. 
3. Deseño técnico: Bosquexo enriquecido e Planos (perspectiva, vistas, esquemas eléctricos) 
4. Planificación e execución: follas de proceso.
5. Orzamento. 
6. Avaliación 
7. Bibliografía e/ou referencias web.

Estudo inicial

O estudo inicial é a primeira sección da memoria técnica e constitúe a base sobre a que se desenvolverá todo o proxecto. Neste capítulo expóñense os elementos fundamentais que xustifican a necesidade dunha solución técnica, así como as condicións de partida.

Contidos habituais:

• Descrición do problema ou situación a mellorar: expónse de forma clara e obxectiva cal é a problemática: pode tratarse dunha carencia, unha demanda concreta, unha situación ineficiente ou un reto tecnolóxico ou social.
• Xustificación da necesidade da intervención: explícase por que é necesario abordar esta situación, cales son as consecuencias de non actuar e que beneficios se esperan cunha posible solución.
• Análise das necesidades funcionais e técnicas: estúdanse as necesidades da persoa usuaria ou destinataria (confort, accesibilidade, eficiencia...), así como os requisitos técnicos mínimos para resolver o problema.
• Limitacións e condicionantes iniciais: inclúense aspectos como o orzamento dispoñible, o tempo para a execución, as dimensións do espazo, os materiais posibles, normativas legais, ou condicións ambientais.
• Referencias ou proxectos similares: pode mencionarse brevemente se existen solucións previas ao problema, outras iniciativas semellantes ou estudos de caso inspiradores.

Exemplo aplicado (vivenda bioclimática)

O problema detectado é a escasa eficiencia enerxética das vivendas tradicionais no medio rural galego. A solución técnica debe responder ás necesidades de illamento térmico, aproveitamento solar e confort interior, dentro dun orzamento reducido e empregando materiais locais. A actuación debe adaptarse a unha edificación existente, mantendo elementos patrimoniais.

Proposta de solucións

Neste capítulo preséntanse as distintas opcións posibles para resolver o problema detectado no estudo inicial. Trátase dunha fase creativa pero fundamentada, na que se exploran alternativas e se valoran as súas vantaxes e inconvenientes. Poden empregarse técnicas como o Brainstorming, Mapa de ideas, SCAMP....

Contidos habituais:

• Xeración de ideas ou alternativas técnicas: descríbense polo menos dúas ou tres solucións posibles. Cada unha debe explicarse brevemente: en que consiste, como se aplicaría, e que recursos require (materiais, tecnoloxía, espazo...).
• Criterios de selección: establécense os criterios que se van empregar para comparar as propostas: poden incluír o custo, a sustentabilidade, a dificultade técnica, o impacto estético, o tempo de execución, a adaptabilidade ó entorno, etc.
• Táboa comparativa (opcional pero moi útil): inclúe unha táboa onde se valoren as diferentes propostas segundo os criterios seleccionados. Isto axuda a visualizar cal é a opción máis equilibrada.
• Selección da solución definitiva: xustifícase a elección dunha das propostas como a máis axeitada. A elección debe basearse nos criterios establecidos, e non só na preferencia persoal.
• Melloras ou adaptacións á solución escollida: pode explicarse se a proposta elixida foi mellorada a partir das outras ou adaptada dalgunha idea inicial.

Exemplo aplicado (vivenda bioclimática)

Fórmanse tres propostas:
a) Restauración mínima mantendo materiais orixinais.
b) Rehabilitación con fachada ventilada e paneis solares.
c) Demolición parcial e nova estrutura pasiva con madeira local.

Valóranse aspectos como: eficiencia enerxética, impacto visual, sustentabilidade, custo e tempo de execución.

Escóllese a opción (b) por ofrecer o mellor equilibrio entre respecto polo patrimonio e mellora do confort, cun investimento asumible.

Deseño técnico

Este capítulo recolle o desenvolvemento técnico e detallado da proposta elixida. Non se trata só dunha idea xeral, senón da súa concreción: medidas, materiais, procesos e funcionamento.

Contidos habituais:

• Bosquexo enriquecido: faise un debuxo a man alzada que contén explicacións técnicas precisas do proxecto: forma, dimensións, disposición de elementos, funcionamento básico, e calquera característica destacable.
• Materiais e compoñentes: relaciónanse os materiais que se van empregar, indicando as súas propiedades, razóns da elección (eficiencia, sustentabilidade, dispoñibilidade...) e posibles alternativas.
• Debuxos técnicos e esquemas: planos, croquis ou diagramas: planta, alzado, seccións, esquemas eléctricos ou de funcionamento, se os houber. Pódense empregar ferramentas CAD ou bosquexos manuais con escala.
• Funcionamento e xustificación técnica: explícase como funciona o proxecto: por exemplo, como se calefacta ou ilumina, como circula o aire, como se articula un mecanismo ou como se garante a eficiencia.
• Medidas de seguridade e sustentabilidade: indícanse aspectos relacionados coa prevención de riscos (eléctricos, térmicos, estruturais...) e co impacto ambiental: consumo enerxético, uso de materiais reciclables ou locais, etc.

Exemplo aplicado (vivenda bioclimática)

• A vivenda terá forma rectangular de 9x6m, orientada a sur cunha galería acristalada.
• Os muros serán de termoarcilla con illamento interior e SATE no exterior.
• A cuberta terá 18 cm de la de roca e teito ventilado de madeira de castiñeiro.
• Incluirase un sistema de ventilación mecánica con recuperación de calor.
• O funcionamento bioclimático baséase na captación solar pasiva e na inercia térmica dos materiais.
• Os PLANOS foron deseñados con LibreCAD e inclúen planta baixa, sección transversal e esquema de circulación do aire.

Proceso

Este capítulo aborda a organización temporal, técnica e material necesaria para levar a cabo o proxecto. Debe incluír as fases previstas, os recursos humanos e materiais, así como a previsión de tempos e tarefas.

Contidos habituais:

• Follas de proceso: divídese a execución en etapas ou fases lóxicas: preparación, execución, remates, verificación... Cada fase inclúe unha descrición breve das tarefas que a compoñen, as ferramentas e recursos humanos e técnicos: quen realiza cada tarefa (alumnado, profesorado, técnicos...), que ferramentas se necesitan e en que momento do proceso.
• Cronograma de tarefas: inclúe unha táboa (ou gráfica Gantt) onde se indican as tarefas e o tempo estimado para cada unha. É fundamental para controlar os prazos.
• Distribución de materiais: estímase o momento en que serán necesarios os materiais (compra, transporte, almacenaxe), así como calquera consideración loxística.
• Posibles dificultades e solucións: anticipación de problemas potenciais (climáticos, técnicos, de coordinación…) e propostas de solución ou prevención.

Orzamento

Neste capítulo preséntase unha estimación razoada do custo total do proxecto. Non é necesario un cálculo exacto, pero si unha aproximación realista baseada en fontes consultables, como prezos medios, catálogos ou orzamentos de referencia.

Contidos habituais:

• Partidas orzamentarias principais: o orzamento adoita dividirse en capítulos ou partidas, como:
  • Materiais de construción
  • Man de obra
  • Instalacións (eléctrica, ventilación, etc.)
  • Ferramentas e alugueres
  • Transporte e loxística
  • IVE ou impostos
• Táboa de orzamento: inclúe os conceptos, cantidades, prezo unitario e custo total por partida.
• Fonte dos prezos: pódense indicar fontes consultadas: webs, provedores locais, ferraxerías, etc.
• Observacións adicionais: explicación de posibles variacións de prezo, marxe de erro ou elementos non incluídos (como mantemento, imprevistos…).

Avaliación

Este capítulo analiza o grao de cumprimento dos obxectivos do proxecto, a eficacia da solución implantada e as melloras potenciais. É unha reflexión crítica e fundamentada que permite consolidar aprendizaxes e detectar puntos débiles.

Contidos habituais:

• Criterios de avaliación: defínense indicadores claros que permiten avaliar o éxito do proxecto. Algúns exemplos:
  • Funcionalidade (cumpre a súa función?)
  • Eficiencia enerxética
  • Adecuación ó contexto e ó usuario final
  • Sostibilidade dos materiais
  • Calidade estética ou técnica
  • Axuste ó orzamento e prazos
• Resultados obtidos: descrición dos logros conseguidos e datos ou observacións que os apoien. Pódese engadir unha táboa de control ou rexistro de medidas (por exemplo, consumo enerxético, temperatura interior...).
• Valoración do proceso: reflexión sobre como foi o traballo en equipo, a organización, a repartición de tarefas, o uso das ferramentas, o cumprimento do cronograma...
• Propostas de mellora: recóllense aspectos que se poderían mellorar se se repetise o proxecto: materiais alternativos, optimización do deseño, tempo, ferramentas, etc.

Documentación e presentación final

Todo o material anterior debe presentarse nun documento de texto convenientemente paxinado e indexado. Non deben empregarse máis de dúas tipografías nin, alén dos títulos, un tamaño maior de 12. 

As imaxes han de estar convenientemente etiquetadas, indicando autoría e dereitos de uso. Só poden empregarse imaxes propias ou aquelas etiquetadas como CC.

Debes ser quen de inserir o documento no teu portfolio, como che explicaremos no capítulo seguinte.