"Carnavalito"
Como non podía ser doutra maneira, nesta unidade didáctica continuamos viaxando! Pero se hai unha celebración que non entende de fronteiras, esa é sen dúbida O Entroido. Celébrase en tódalas partes do mundo, e cada unha fixo desta fermosa festa, co paso do tempo, a súa propia tradición popular. Neste caso centrarémonos no lugar propio da súa orixe, que poderedes coñecer xunto cun pouquiño de historia na seguinte epígrafe!
Un pouco de historia
O carnavalito é un tipo de música andina de raíces incas, tradicional no norte de Arxentina e especialmente das provincias de Salta e Jujuy. Báilase dende tempos inmemoriais, e por suposto xa estaba presente antes do descubrimento de América. Ten un ritmo característico, e nas súas interpretacións as persoas que bailan empregaban unha vestimenta moi particular chea de alegría e colorido.
Humahuaca
Humahuaca é unha cidade pertencente á provincia de Jujuy, situada ao norte de Arxentina. É moi coñecida pola súa paixase, desértica e chea de grandes acantilados que reciben o nome de "Quebrada de Humahuaca". Semella un trabalinguas, non si? Pois ben, resulta que esta pequena poboación foi a escollida por Edmundo Zaldívar (un mozo compositor de 24 anos) como lugar de inspiración para compoñer no ano 1941 unha afamada canción que cambiaría a forma de entender o entroido no resto do planeta: o "Carnavalito Humahuaqueño". Queredes escoitala? Imos probar cunha versión tocada con instrumentos tradicionais andinos. De seguro que xa a coñecedes aínda que non reparedes!
Os instrumentos que acabas de escoitar son típicos da música andina, e están moi presentes na cultura de países como Arxentina, Bolivia ou Chile. Imos coñecelos!
Frauta de pan: é un instrumento de vento composto por varios tubos de madeira de diferentes lonxitudes, que soan ao soprar por eles emitindo cada un unha nota diferente. A súa afinación está baseada na escala pentatónica (de cinco sons), e as súas orixes remóntanse á Antigua Grecia do ano 1200 a.C.
Erke: este tipo de instrumento de vento está fabricado empregando canas de bambú ocas, e pode acadar unha lonxitude total de ata sete metros... case nada! Tamén recibe o nome de coroneta o quepa.
