Enerxía
A orixe fundamental de case toda a enerxía que consumimos é o sol, xa que é o principal factor causante de todas as interaccións ambientais a través da luz e a calor. O sol provoca reaccións xeolóxicas, químicas e climáticas que determinan as diferentes fontes de enerxía, xa sexan renovables ou non renovables. A enerxía é a capacidade dos corpos para realizar un traballo e producir cambios neles mesmos ou noutros corpos. É dicir, a enerxía defínese como a capacidade de facer funcionar as cousas. A unidade de medida que utilizamos para cuantificar a enerxía é o joule (J), en honra ao físico inglés James Prescott Joule. Sen enerxía ningún proceso físico, químico ou biolóxico sería posible. Aínda que falamos de enerxía en singular, existen diferentes formas de manifestarse: enerxía mecánica, térmica, radiante, eléctrica, química e nuclear. |
No seguinte video podes ver que é cada unha destas enerxías e algúns exemplos das mesmas. Activade os subtítulos para poder lelo en galego. |
(Preme na imaxe para ampliala) |
Por exemplo, nunha maceira: a árbore absorbe luz (enerxía) da radiación solar, convertendo a enerxía luminosa en enerxía química que almacena en moléculas orgánicas. Logo utiliza esta enerxía para producir follas, ramas e froitos. Cando unha mazá, chea de enerxía química, cae da árbore ao chan, a súa enerxía de posición (almacenada como enerxía potencial) transfórmase en enerxía cinética (a enerxía do movemento) a medida que cae. Cando a mazá golpea o chan, a enerxía cinética transfórmase en calor (enerxía calórica) e son (enerxía acústica). Cando alguén se come a mazá, o seu organismo transforma a enerxía química almacenada no movemento duns músculos (entre outras cousas), e así poderiamos seguir transformando a enerxía unha e outra vez.