Gravidade
Todos/as temos a experiencia de que os corpos caen sobre a superficie terrestre. Se deixamos caer un corpo libremente faino en liña recta e en vertical. Esta forza coa que os corpos son atraídos cara a Terra, chámase gravidade. Durante centos de anos, a xente non pensou na gravidade. Logo, conta a lenda que un científico chamado Isaac Newton viu caer unha mazá dunha árbore e comezou a pensar en por que caera. Ocorréuselle a idea de que unha forza tiraba cousas ao chan. ISAAC NEWTON astrónomo, físico e matemático, é un dos científicos máis importantes da historia. A maioría dos/as científicos/as considérano “o científico máis grande de todos os tempos”. A el debemos o descubrimento da Lei de Gravitación Universal. Demostrou que as leis naturais que gobernan o movemento na Terra e as que gobernan o movemento dos corpos celestes son as mesmas. É autor dunha obra científica monumental: Philosophiae Naturalis Principia Mathematica, comunmente coñecida como Principia, na cal se explican os fundamentos matemáticos do universo. |
Newton formulou as tres leis do movemento:
- Lei da inercia: todo corpo permanece en repouso ou en movemento se non actúa sobre el ningunha forza.
- Lei ou principio da dinámica: a aceleración que experimenta un corpo é igual á forza exercida sobre el e dividida pola súa masa.
- Lei da acción e reacción: explica que por cada forza ou acción exercida sobre un corpo existe outra igual de sentido contrario.
Destas tres leis deduciu unha cuarta, que é a máis coñecida: a lei da gravidade.
A LEI DA GRAVIDADE explícanos por que os corpos son atraídos cara á terra. Os corpos que teñen maior masa son atraídos cunha forza máis intensa e a esta forza chámaselle gravidade.
A gravidade é invisible e atrae as cousas cara ao centro da terra, sen ela non poderiamos manternos en pé. As follas das árbores e a túa pelota de fútbol baixan de maneira inevitable cara ao chan, xa que é a gravidade a que os atrae e evita que saian disparados cara ao espazo. Pero non só nos afecta a gravidade no noso planeta. O noso sistema solar e o universo enteiro está afectado por esta forza. Por exemplo, os planetas mantéñense nas súas órbitas virando ao redor do sol grazas á forza da gravidade.