A ciencia que nos rodea
Como vos imaxinariades a idea soounos moi ben pero nunca escoitaramos falar desa fundación nin do seu traballo así que coma sempre puxémonos mans a obra en busca de información.
Xiana púxose coma tola, o seu eran as matemáticas e as ciencias así que estaba emocionada. Naquel mesmo momento pediulle ao mestre se podía usar o ordenador para buscar información sobre a fundación e o seu traballo.
Contounos que a Fundación Amancio Pérez era unha organización sen ánimo de lucro cuxo obxectivo era acercar e fomentar a ciencia aos nenos e nenas dunha forma práctica e lúdica. Desenvolvían diferentes proxectos e neste curso a proposta era <<Somos astronautas>>, en colaboración cos científicos/as que desenvolven o seu traballo na Estación Espacial Internacional.
Se queres darte un paseo virtual pola ISS podes premer na imaxe de Google Earth Para saber onde esta a ISS en todo momento e ver o mesmo que os/as astronautas preme na imaxe da páxina Estación Espacial. |
|
Para conseguir a praza no campamento científico decidimos repartirnos o traballo a realizar. Aldara escolleu traballar sobre a gravidade porque o de flotar no espazo parecíalle moi interesante. Xiana decidiu traballar sobre os efectos da luz porque escoitara falar sobre as auroras boreais e gustáralle moito. Mauro fora unha vez á Casa das Ciencias e quedara abraiado cos diferentes tipos de enerxía que existen, así que decidiu investigar máis sobre elas. E Antón que lle gusta tanto a lectura, lera 20.000 leguas de viaxe submarino e quería entender a razón pola que algúns obxectos flotan mellor que outros e como pode ser que un submarino ás veces flote e outras non.