Saltar navegación

Galego

Que conmemoramos? / 10 decembro, Día Internacional dos Dereitos Humanos

O 10 de decembro de 1948, tras o horror e a traxedia humana que supuxo a Segunda Guerra Mundial, a Asemblea Xeral da ONU aprobou a Declaración Universal dos Dereitos Humanos (DUDH).


Por vez primeira na historia da humanidade, un texto elaborado por países de diferente cultura e tradición xurídica recollía a esencia da dignidade humana e os dereitos necesarios para garantila.  

Nos seus 30 artigos, a DUDH establece uns dereitos universais e inalienables, é dicir, que pertencen a todos os seres humanos polo simple feito de selo e que ningunha persoa pode verse privada deles.

Desde entón e até hoxe os Dereitos recollidos na Declaración Universal non sempre foron respectados, mais a existencia  deste documento é o mellor garante de que coa implicación dos seres humanos algún día se logrará.

   
Dereitos humanos
GDJ, Human, (CC0)

Velaquí os cinco primeiros:

Artigo 1.- Todos os seres humanos nacen libres e iguais en dignidade e dereitos e, dotados como están de razón e conciencia, deben comportarse fraternalmente os uns cos outros.

Artigo 2.- Toda persoa ten todos os dereitos e liberdades proclamados nesta Declaración, sen distinción algunha de raza, cor, sexo, idioma, relixión, opinión política ou de calquera outra índole, orixe nacional ou social, posición económica, nacemento ou calquera outra condición. (...)

Artigo 3.- Todo individuo ten dereito á vida, á liberdade e á seguridade da súa persoa.

Artigo 4.- Ninguén estará sometido a escravitude nin a servidume; a escravitude e trata de escravos están prohibidas en todas as súas formas.

Artigo 5.- Ninguén será sometido a torturas nin a penas ou tratos crueis, inhumanos ou degradantes.
                                                                             

                                                               (Declaración Universal dos Dereitos Humanos, ONU.)

Paso 1

x

x

ACTIVIDADE 1. Léxico

Escolle a resposta correcta, marcando un X.
1. Que os Dereitos Humanos sexan universais quere dicir:
a. Que se aplican en todo o universo.
b. Que se aplican a todos os seres humanos con independencia do lugar onde vivan, da súa orixe étnica, cor, raza, sexo, relixión, lingua ou calquera outra condición.
2. Que os Dereitos Humanos sexan inalienables quere dicir:
a. Que as persoas non poden ser privadas deles.
b. Que os alieníxenas non poden gozar deles.
3. Os Dereitos Humanos garanten a dignidade humana. Por dignidade humana entendemos:
a. O dereito que teñen os seres humanos a que se crea na súa palabra.
b. O dereito que teñen as persoas polo simple feito de seren humanas a seren respectadas e valoradas como seres individuais e sociais.


Habilitar JavaScript

Actividade 2. Reflexión

Realizamos esta actividade en grupos.

Imaxinade que se descobre vida intelixente extraterrestre. Estes seres establecen comunicación coa Terra e solicitan información sobre os seres humanos. Queren saber que somos e como somos. Redactade unha carta para enviárllela na que contestedes as súas preguntas.

Arrow

Seguide esta metodoloxía para realizardes a actividade:

1. Escribide individualmente un guión/borrador da vosa carta.

2. Poñede en común no grupo os escritos. Elaborade un novo borrador que recolla as ideas de tod@s vós. Organizade estas ideas.

3. Redactade a carta. Participade tod@s. Esforzádevos en lograr unha boa expresión escrita. Prestade especial atención á puntuación e ortografía.

4. Lede a vosa carta en alto.

Para saberdes máis

O 20 de novembro do ano 1959 a Asemblea Xeral das Nacións Unidas aprobou a Declaración dos Dereitos do Neno, con 10 principios básicos que pretenden garantir a integridade da infancia.

No apartado Que imos facer? tedes acceso á versión íntegra dos DDHH e tamén a unha versión simplificada de lectura máis doada.